Naalakkersuisut pingaarnersiuinerat tupigusuutigaat
- Inatsisartut ullumi oqallinnerata inernera quarsaarnarpoq, taama Demokraatit sinnerlugit Inatsisartuni ilaasortaq Palle Christiansen naliliivoq.
Meeqqat atugarisaannik pitsanngorsaanissaminngarnit soorlu umimmaat tuttullu atugarisaannik pitsanngorsaanissamut aningaasaliinissap qinikkanit pingaartinneqarnerunera, Inatsisartut ullumi ataatsimiinnerani ersertoq Palle Christiansen oqarpoq:
-Assut tupaqqavunga, takuneqarsinnaalerpormi naalakkersuisoqartugut angajoqqaanngortut sivisunerumik sulinngiffeqartalernissaannut tapersersuinngitsunik, meeqqat angerlarsimaffiup avataanut inissinneqarneranni inissiivissanik inatsisitigut qulakkeerinissamut tapersersuinngitsunik, taamatuttaaq inunnik atisanngitsunik assilisat pisiniarfinni meeqqat isigisinnaasa nalaanniititsisarnerup inerteqqutaalernissaanut tapersersuinngitsunik, tamanna assut tupaallarnarpoq, paasinarmammi tuttut umimmaallu nussorneqarnissaannut aningaasassarsiornissaq, Naalakkersuisunit salliutinneqartoq, Palle Christiansen oqarpoq.
Aperineqarami akerlianik paasisinnaannginneraa suut tamarmik inatsisilersorneqarsinnaanngitsut akivoq paasisinnaalluarnerarlugu, taamaattorli suliassanik pingaarnersiuisoqanngitsoq oqarluni.
Palle Christiansen-ip naliliinera Naalakkersuisut siulittaasuata Hans Enoksen-ip ima akissuteqarfigaa:
- Uani oqaatigissavara taamatut oqarnera isumaqatiginngilluinnaqqissaarakku. Inatsisartunimi oqaluuserisassat amerlasuut Inatsisartut namminneq Ataatsimiititaliaannut ingerlatinneqartarput, tassanilu Ataatsimiititaliap sulinermini tunngaviit pissartiatik atorlugit inassuteqartarput, siunnersuut akuerineqassanersoq imaluunniit akuerineqassannginnersoq.
- Malugeqqullugu oqaatigissavara ilaatigut Inatsisartuni suliassarinngisavut massakkut suliarisaqattaarlugit ingerlaniarsarigatta. Soorlu umiatsiat pinngitsooratik iputeqarnissaat allallu aalajangertinniarneqarput, uffa innuttaasut, inatsisitigut pituttugaanngikkaluarlutik namminneq pisussaaffigisariaqagaat. Inuuttaasut akisussaaffiat tamanna Naalakkersuisunit ataqqivarput, suna tamaat inatsisinngorlugu nunami maani aalajangersarneqarsinnaanngimmat. Hans Enoksen oqarpoq nangipporlu:
- Niuertut amerlasuut ullut 14-it qaangiupput erserissumik oqariartuutigaat, atisaqanngitsunik assilisat meeqqanut inornarnerusunut inissitsiterneqartut. Tamanna qujanarpoq, Naalkkersuisullu akissuteqaatigaat, taamatut aaqqigallarneq iluaqutaanngippat taava inatsisiliuunnissaa aqqutissiuutissavarput.
Inatsisartut taamatut siunnersuuteqartarnerat takutitsinngila, Inatsisartut suleriutsimik ilismasaqannginnerannik?
- Naagga taamatut uanga oqarusunngilanga, siunertagut Inatsiartunut apuukkusuttarpagut, kisiannili amerlavallaarput Inatsisartut Oqaluttarfiannut apuunneqartariaqanngikkaluartut, Hans enoksen oqarpoq.
Inatsisartut ullumi ataatsimiinneranni oqaluuserineqartut amerlanersaat aappassaaneerlugit oqaluuserisaapput, Inatsisartunilu ilaasortat partiinit tamaneersut siunnersuutaasa affaat itigartinneqarput.
