Naalakkersuisut pilersaarusiornissaat Inuit Ataqatigiit utaqqikatappaat

Naalakkersuisup Kim Kielsenip iliuuseqarnissaa ukiup affaa ujartorsimasartik piviusunngortariaqalersoq, Inatsisartuni Folketingimilu ilaasortaq Juliane Henningsen isumaqarpoq:

- Utaqqiuarsimavugut silaannaap kissatsikkiartornera pillugu iliuusissap takkunnissaanut. Aamma neriorsorneqaraluaratta aasartinnagu piareersiamassasoq, kisianni taamaattoqanngilaq, oqarpoq.

Pingaartumik politikeritut nunarput pillugu nunani allani angalasuulluni sila pillugu oqallittoqaleraannga nunatta politikkeqannginnera kipiluttunarsiortitsisartoq oqaatigaa.

-Nunatta suut anguniassanerai aamma pingaartinnerai nalorninartarsimavoq, nunarput naalakkersuisullu suliamut pitsaanngitsumik suliaqarsimammata, Juliane Henningsen oqarpoq, erseqqissarlugulu Inuit Ataqatigiit suliniaqataarusuttut.

Inuussutissarsiutinik ingerlatsisut silap pissusaanik eqqugaasinnaasut tusarniaaffiginissaat aamma aatsitassarsiornissat nukissiuutinillu atuisussat, soorlu Alcoa eqqartorneqartariaqarsorai.

- Pingaaruteqarpoq suliffeqartut tamarmik - sulisitsisut, sulisartut, aalisartut, piniartut - ukiuni makkunani eqqugaasut - suliap ingerlanissaanut peqataatilluinnarnissaat.

Partiillu inatsisartuni ilaasortaatitallit Naalakkersuisoq Kim Kielsen piaartumik oqaloqatigisariaqaraat, Juliane Henningsen oqarpoq.

Avatangiisinut pisortaqarfimmi immikkoortortami pisortaq Michael Pedersen ilisimatitsivoq, sila pillugu Kalaallit Nunaata ukiunut tullernut suliniuteqarnissaanut tunngatillugu tusarniaassutissaq naammassilivikkitsik, januaarilu aallartilaarpat susassaqartunut tamanut nassiussuutilissagitik.