Naalakkersuisut piffissaliussaq aalajangiusimavaat

Aluminiumimik aatsitsivissap inissisimaffissaa piginnittussaalu pillugit naalakkersuisut aalajangiinerminnut tunngavii naammanngitsut, nalilersuinerillu tunngavissaqarluarnerusariaqartut politikkikkut illuatungiliuttut isumaqarput. Taamatut inatsisartut upernaakkut ataatsimiinneranni ulluani siullermi piumasaqarput. Kisianni naalakkersuisooqatigiit ataatsimik amerlanerussuteqarlutik piffissaliussap aalajangiusimaneqaannarnissaa naqissuserpaat.

- Aalajangiiniaraanni, aalajangernerup kingunissai paaseqqaarneqartariaqarput. Aningaasarsiornikkut kingunissai, sulisoqarnikkut avatangiisinullu kingunissai, apeqqutillu allarpassuit aalajangiinissamut tunngavilersuutigineqartumi ilanngunneqarsimanngillat, Inuit Ataqatigiit siulittaasuat Kuupik Kleist oqarpoq, nangillunilu:

- Inuit Ataqatigiinniit isumaqarpugut aalajangiisoqartinnagu kingunissai tamakkiisumik ilisimasaqarfiginerusariaqarivut, annikitsukkuutaartumik aalajangiinissaq pinnagu.

Alcoa aamma Namminersornerullutik Oqartussat aluminiumik aatsitsivissamik piginneqatigiissaasut, tassungalu atatillugu erngup nukinganik nukissiorfiit atorneqartussat aamma piginneqatigiinnikkut ingerlanneqassasut, naalakkersuisut siunnersuutigaat.

Aatsitsivissaq marsip 14-ianni Inatsisartuni oqallisigineqassaaq.