Naalakkersuisut: Peqqinnissaqarfik nutarterneqassaaq
- Peqqinnissaqarfimmi peqqissaaveqarfinnilu 16-iusuni nakorsassaaleqiuartarnerit imaluunniit peqqissaasussaaleqiuartarnerit, paarlattaasartunillu akisoqisumik atuisariaqartarnerit ukiuni arlaqalersuni ajornartorsiutaapput aaqqikkuminaatsut, tamaattumik allatut aaqqissuusseqqittoqartariaqarpoq.
Peqqinnissaqarfiup aaqqissuuteqqinneqarnissaa siunertaralugu nassuiaasiornissamut Peqqissutsimut Pisortaqarfik ukioq 2004-mi suliakkerneqarpoq, suliakkiussarlu naammassisaq, taamatut nipilimmik innersuussuteqartoq, Inatsisartut ippassaq ataatsimiinneranni Peqqissutsimut Naalakkersuisup Agathe Fontainip saqqummiuppaa:
Peqqissaqarfik ukiuni 50-ini allanngortinneqarsimanngitsoq ullutsinni pissutsinut naleqqussarneqartariaqarpoq. Peqqissaqarfimmik allanngortitsinissaq siunertaralugu nassuiaasiaq taama naatsumik oqaatigissagaani imaqartoq, Peqqissutsimut Naalakkersuisup Agathe Fontainip ullumi saqqummiuppaa. Tassani peqqinnissaqarfiup nunami peqqissaaveqarfinnut agguagaanera sulisoqarnikkullu pissutsit ukiuni arlalissuanngortuni innuttaasunut sullitanut kipiluttunarsisimasut aaqqiissutissanik siunnersuuteqarfigineqarput.
Siullermik peqqissaaveqarfiit ullumikkut 16-iusut siunissami arfineq marluinnanngortinneqarnissaat siunnersuutigineqarpoq. Peqqissaaveqarfiit siunissami arfinillit illoqarfinni Upernavimmi, Ilulissani, Aasianni, Sisimiuni, Nuummi, Qaqortumi Tasiilamilu inissinneqarsinnaanerat siunnersuutigineqarluni.
Peqqissaaveqarfiit ikilippata Telemedicini, tassa qarasaasiakkut attaveqaatit atorlugit nakorsiartitsisarneq, nuna sinneranut atatillugu atorneqalissaaq.
Peqqissaaveqarfinni nakorsaqarniarneq peqqissaasoqarniarnerly ingammik isorliunerusuni ajornartorsiutaajuarpoq, peqqissaaviillu ikinnerulerpata napparsimmavinni nakorsanik peqqissaasunillu pissarsiniarneq ajornannginnerulissaaq.
-Immikkoortortani annerusuni aalajangersimasunik atorfeqartussanik pissarsiorneq ajornannginneruvoq assigiinngitsunik ilinniagallit oqimaaqatigiittumik sulisinnaanerusarmata, taamaattumik soorlu nakorsat peqqissaasut ernisussiortut aaviisartut allallu napparsimmaveqarfinnut, qitiusumik ineriartortitsiviusunngortussanut arfineq marlunnut katersuunneqarsinnaasut, siunnersuummi atuarneqarsinnaavoq.
