Naalakkersuisut oqaaseq 'grønlænderstiv' akuerinngikkaat

Danskit ordbogiannut oqaaseq 'grønlænderstiv' ilanngunneqarsimasoq pillugu Kulturimut naalakkersuisoq danskit kulturimut ministeriannut saaffiginnissimavoq.
Doris J. Jensen, formand for kulturudvalget, opfordrer Naalakkersuisut til at nedsætte en arbejdsgruppe, der skal se på KNR's fremtid. Assi © : Arctic Circle
Allattoq Kenneth Elkjær
novembarip 17-at 2017 11:07
Nutserisoq Erna Lynge

Kulturimut naalakkersuisutulli Doris J. Jensenitut danskit kulturimut ministeriat isumaqarpoq oqaaseq qanganittassimasoq nikassaasuusorlu. Allaffigeqatigiikkamik taama allappoq.

Det Danske Sprog- og Litteraturselskabemilli danskit ordbogiat saqqummersinneqartarmat danskit ministeriat tassunga oqaasissaqanngilaq.

Atuakkamik aaqqissuisoq Lars-Trap Jensen sapaatip akunnerata siuliani KNR-imut nassuiaavoq ingerlatsiviup oqaatsip isumaa isumassaqartinngikkaa. Apeqqutaasoruna danskit oqalunnerminni oqaatsinik atuisarnerat.

Danmarkimi danskit oqaatsit atugaat allaaserisarpavut. Oqaatsit siumut isummiuteriikkat atorneqaqaat. Taamaattumik oqaatsit tamakku tamaasa allattornissaannut pisussaavugut, Lars-Trap Jensen oqarpoq.

AAMMA ATUARUK 'Grønlænderstiv' ordbogimi mianersoqqussutaassasoq

Taanna isumaqarpoq oqaatsip ordbogini pisortatigoortuni allassimanissaa allaaserineqarnissaalu pingaaruteqartoq. 'Grønlænderstiv'-imut nassuiaataassaaq oqaaseq assorsuaq nikassaarpasissuusoq.

- Oqaaseq tusarsaasarpoq, taamaattumik arlaanni allassimasariaqarpoq qupperlugu qanoq atorneqartarnersoq paasiniarneqarsinnaassammat, aaqqissuisoq oqarpoq.

Danskit pisortatigoortumik ordbogianni allassimappat oqaaseq akuerineqassasoq,  Doris J. Jensen oqarpoq.

- Ammip qalipaataanik nikassaasutut toqqaannartumik taaguutaavoq ordbogimilu allakkaanni akuerisaasutut taaneqassasoq, Jensen Naalakkersuisut tusagassiuutinut nalunaarutaanni allappoq.

Taassuma allakkamini ilanngullugu oqaatigaa neriuutigalugu kalaallit pillugit pigiliutiinnakkanik danskit isummiussisarnerannik atuisarnerannillu ministeri nungusaaqataajumaartoq, tusagassiuutinut nalunaarummi Jensen ilanngullugu allappoq.