Naalakkersuisut Nutaarmiunut tikeraarput

Naalakkersuisut nunaqarfimmut Nutaarmiunut tikinnerat, nunaqarfimmiut, ilaqutaasut nunaqarfimmiullu Nutaarmiut eqqaaniittut nuannarivaat, Jens B. Frederiksen oqarpoq. Tikeraarneranni nunaqarfimmiut paasitinneqarput Kalaallit Nunaata sinnerani soqutigineqarmata, aammalu nunatta sinnerani innutaasut aliasoqataanerat Naalakkersuisut nunaqarfimmiunut Nutaarmiormiunut apuuppaat, tamannalu iluaqutigineqartoq, Jens B. Frederiksen oqarpoq.
Allattoq Jaaku Lyberth
februaarip 11-at 2012 15:05

Naalakkersuisut siulittaasuata tullia Jens B. Frederiksen ualimut Nutaarmiuneerlutik Nuummut ingerlaarlutik Ilulissanut aqqussaarneranni oqaloqatigaarput.

Angutip 22-nik ukiullip inunnik pingasunik toqutsisimasutut sisamanillu toqutseriarsimasutut pasineqarnini sisamanngormat tamaasa nassuerutigivai tamatuma kingorna sapaatit akunnerini sisamani  tigummigallagassanngortitaavoq. 

22-nik ukiulik Upernavimmiit Ilulissani iserititsivimmut ippassaq nuunneqarpoq, ataasinngorpat Nuummi pinerluuteqarsimasunut inissiisarfimmut inissinneqassalluni.

22-nik ukiullip killisiorneqarnera matoqqasumik ingerlanneqarpoq, tamannalu illersuisup kissaateqarnera malillugu ingerlanneqarluni.

Eqqartuussivimmi killisiunerup matoqqasumik ingerlanneqarnissaanik aalajangerneq  politiinit nunatta eqqartuussiviani aalajangigassanngorlugu ingerlateqqinneqarpoq.
Nutaarmiuni toqutsinerit toqutseriarnerillu matoqqasumik ammasumilluunniit ingerlanneqassanersut, nunatta eqqartuussiviata ataasinngorpat aalajangiiffigissavaa.

Angutit marluk annertuumik ajoqusertut, aappaa 81nik ukiulik aappaalu 32nik ukiulik  Københavnimut Rigshospitalimut sisamanngormat aallarunneqarput, 81nik ukiulik tallimanngormat ullaakkut niaqqumigut suliarineqarluni.

Rigshospitalimi nakorsat nalunaarutigaat, 81nik ukiulik perulukkaluarluni isumannanngitsoq taamatuttaaq 32nik ukiulik isumannanngitsoq oqaatigineqarluni.

Ajoqusertut angutit marluk qanoq innerat pillugu ataasinngorpat tusagassaqarumaartoq nakorsanit oqaatigineqarpoq.