Naalakkersuisut nunatta illersornissaanut Nato suleqatigerusukkaat

- Kalaallit Nunaata USA-miit tiguarneqarnissaanik aammaartumik oqariartortoqarnera Naalakkersuisoqatigiinniit akuerisinnaanngivillugu oqariartuutigissavarput.

Naalakkersuisut Natomi nunat arfinillit nunatta illersorneqarnera pillugu oqaloqatigalugit tusagassiuutinut maanna nalunaarutigaat.

Frankrig, Tyskland, Italia, Polen, Spania aamma Tuluit Nunaat ataatsimoorlutik tapersersuinerminnik sapaatip akunnerata siuliani nalunaaruteqarput.

Nalunaarullu taanna naalakkersuisut nunanik arfinilinnik oqaatiginninnerminni innersuussutigaat.

- Naalakkersuisoqatigiinniit NATO-mi nunat arfinillit oqariartuutaat aallaavigalugu, NATO aqqutigalugu Kalaallit Nunaata illersornissaa nunat killiit peqatigalugit ingerlanneqarnissaa ilassilluarlugu annertusisamik angunialerparput.

Naalakkersuisut Danmark peqatigalugu Natomi suleqatigiinnerup ilaatut oqaloqatigiinnissaq illersornissamillu ineriartortitsinissaq sulissutiginiarlugu oqaatigaat.

- NATO-mi nunat tamarmik USA ilanngullugu illersornissarput soqutigisaraat taamaattumillu Naalakkersuisuniit illersornissamut NATO aqqutigalugu oqaloqatigiinnerit aamma inerisaanerit Danmark peqatigalugu ingerlannissaat anguniagaraarput, naalakkersuisut tusagassiuutinut nalunaarummi allapput.

- Kalaallit Nunaat, nunat killiit illersoqatigiinnerannut qaqugumut ilaajuaannarnissaa Naalakkersuisoqatigiit isumaqarfigaat.