Naalakkersuisut: Nunatsinni Issittumilu illersornissakkut annertusaasoqartariaqarpoq
Naalakkersuisut Siulittaasuat Jens-Frederik Nielsen, Savalimmiuni ataasinngornermi ataatsimiippoq. Ataatsimeeqatai tassaapput Norgep, Islandip, Danmarkip Savalimmiullu naalakkersuinikkut siuttui.
Tassaasut: Jonas Gahr Støre, Kristrún Frostadóttir, Mette Frederiksen aamma Aksel V. Johannesen.
Ataatsimiinnermi Atlantikup Avannaani Issittumilu sillimaniarnermi politikkikkut inissisimaneq eqqartorneqarpoq.
Sumiiffimmilu pineqartumi illersornissakkut annertusaanissaq pingitsoorneqarsinnaanngitsoq, Naalakkersuisut Siulittaasuat oqarpoq.
- Ilisimaneqarpoq illersornissakkut pissutsit nunatsinni, aamma Issittumi annertusaaffigineqartariaqartut, nunarsuarmi pissutsit aallaavigalugit, Jens Frederik Nielsen KNR-mut oqarpoq.
Eqqartorneqassasoq
Nunatsinnili illersornissaq qanoq annertusaaffigineqartariaqarnersoq tigussaasumik maanna oqaatigiumanngilaa.
- Taanna iligiit akunneranni eqqartorneqassooq.
- Kisianni qularnanngitsumik pissutsit maannakkut qiviarutsigit nakkutilliineq annertuumik aallullugu, annertusaaffigalugu ingerlanneqartariaqarpoq, Jens Frederik Nielsen oqarpoq.
Tapersersuisut
Ataatsimiinnermi taakkuinnaat eqqartorneqanngillat. Kalaallit Nunaatami USA-mit nunanillu allanit pissaaneqarluartunit tatineqarnera aamma eqqartorneqarpoq.
- Tamakkiisumik nunat siuttui ataatsimeeqatikka tapersersuipput nunatsinnut. Nunarsuatsinni tamat oqartussaaqataanerata ataani pissutsit, maannakkut unammillerneqalaartut, taakkua akuersaarneqanngilluinnartut oqariartuutigineqarpoq.
Norgep, Islandip, Danmarkip Savalimmiullu naalakkersuinikkut siuttuinik ataatsimeeqateqarneq siulliuvoq. Taakkuali ataavartumik maannamit ataatsimiittalernissaat isumaqatigiissutaavoq. Ataatsimiinnissap tulliata suli inissinneqanngilaq.
Savalimmiuni Naalakkersuisut Siulittaasuat, Aksel V. Johannesen, immikkut aamma ataatsimeeqatigineqarpoq. Tamannali kaffisoqatigiinneriinnaasoq suleqatigiinnerulli ingerlateqqinnissaa isumaqatigiissutigigitsik Jens Frederik Nielsenip erseqqissaatigaa.
