Naalakkersuisut Nunatsinni aningaasarsiornikkut pingaartitatik ullumi saqqummiuppaat
Aningaasarsiornikkut Nunatsinni siuariartortoqarnissaa siunertaralugu politikkikkut ukiuni tulliuttuni anguniagassat assigiinngitsut, Aningaasaqarnermut Naalakkersuisup Vittus Qujaukitsup ullumi saqqummiuppai.
Nunatsinni aningaasarsiornikkut siuariartortoqassappat, inuiaqatigiinni suliffissaaleqinerup annikillisarneqarnissaa allaqqunneqarsinnaanngitsoq, aningaasaqarnermut naalakkersuisup Vittus Qujaukitsup saqqummiinermini oqaatigaa, innuttaasullu ilinniarluarsimasuunissaat, piginnaanngorsarneqarnissaallu tassunga atatillugu pingaaruteqartoq ilanngullugu oqaatigalugu.
Aningaasarsiornikkut ineriartortitsivissatut takorloorneqartut pingaarnerit tassaapput aalisarneq, aatsitassarsiorneq, takornarniartitsisarneq suliffeqarfiillu allat assersuutigalugu kulturikkut sulinitit sanaartornerlu.
Suliniutimmi taakku piviusunngussappata, aningaasat suminngaanniit aaneqassappat? Partiimmi illuatungiliuttut qineqqusaarnerup nalaani ilaatigut tamanna apeqqutigaat. Vittus Qujaukitsoq ima akivoq:
- Apeqqut taanna immikkuualuttunngorlugu suli pulaffiginngilarput, kisiannili aningaasanut inatsisissap suliarineqarnerani Namminersorlutik Oqartussani pisortaqarfiit assigiinngitsut aningaasanut inatsimmi aningaasaliiffigisassavut pillugit ersarissumik najoqqutaqarlutik toqqammaveqarlutillu sulinissaat pingaaruteqarmat, tamatta isumaqatigiissutigisinnaasavut taakku politikkitsinni ersiutaapput, Aningaasaqarnermut Naalakkersuisoq Vittus Qujaukitsoq oqarpoq.
Aalisakkanik nutaanik aalisarsinnaanissaq, aalisarfiillu nutaat aalisarfissaasinnaanissaat aningaasarsiornikkut ineriartortitsinermi periarfissaasinnaanissaat, Aningaasaqarnermut Naalakkersuisup oqaatigaa, soorlu aamma Nunatsinni aatsitassarsiornerup aallartisarneqarnissaanut atatillugu sinaakkutissat ujaasisarnissamik piiaanissamillu periarfissiisut ineriartortinneqarnissaat siunniunneqartoq.
Pisortat sullissiviisa suliassanut pingaarutilinnut atatillugu suleqatigiinnerat aamma pitsaanerusariaqartoq, Aningaasaqarnermut Naalakkersuisup oqaatigaa:
- Pisortani ingerlatsivitsinni ingerlatatta tamarmik ataatsimut nalilersuiffigineqarnissaat massakkut misissuiffigileruttorparput, pisortani aningaasaliiffigisartakkavut taavalu aningaasanut suna pissarsiarisarnerlugu nalilersorlugit ingerlatilerparput, taamaasilluta aningaasat aningaasaliissutigisartakkatta sunniutaat allanut sanilliullugu pissarsissutaasarnersut oqimaalutaanermi ilaalerniassammata, Vittus Qujaukitsoq oqarpoq.
Imatut paasineqassava soraarsitsiortortoqarsinnaasoq?
- Taanna siunertaanngilaq, kisiannili kiffartuussinitsinni suna pitsanngorsaaffigineqarsinnaasoq taavalu ingerlatsinermi aningaasartuutikillisaanitsigut aningaasat ikinnerusut atorlugit ullumikkornit pissarsiarisartakkatta ajornerulersinngikkaluarlugit pissarsiarineqarsinnaanerat tassani oqariartuutaavoq, Aningaasaqarnermut Naalakkersuisoq Vittus Qujaukitsoq oqarpoq.
