Assi: Ivik Kristensen/KNR

Naalakkersuisut nikititernerini Randi killitsisimaartoq Vittulu oqiliallassimaartoq

Naalakkersuisuni suliassaqarfiit agguarneqarnerat Naalakkersuisoqatigiinnissamut isumaqatigiissummiittoq uterfigeqqinniarlugu Naalakkersuisut siulittaasuata Kim Kielsenip aalajangerpaa, suliassaqarfinnillu Aningaasaqarnermut Naalakkersuisoqarfimmi ullup qeqqata siorna nalunaaqutaq qulinngortoq tunniussivoq.

Demokraatit siulittaasorisimasaata, Andreas Uldumip, suliassaqarfigisimasai, tassa aningaasaqarneq aatsitassallu Randi Vestergaard Evaldsenip suliassaqarfigilerpai.

Naalakkersuisoqatigiit isumaqatigiissutaat malillugu suliassaqarfiit taakku Demokraatinit tigummineqartussaammata, Randi Vestergaard Evaldsen tupaallanngilaq.

- Akisussaaffik tigusussaallugu ilisimareeratsigu sillimaffigereerlutigulu ajunngilaq, aningaasaqarnermut aatsitassanullu naalakkersuisoq, Randi Vestergaard Evaldsen taama oqarpoq.

Aamma atuaruk NIKITITERINEQ Aningaasaqarnermut naalakkersuisoqarfik Randip akisussaaffigilissavaa

Taamatullu atuutilernermini maanna suliassami pingaaruteqarnerpaajugallartoq sunaanersoq aningaasaqarnermut naalakkersuisup erseqqissarpaa.

- Tassa massakkut suliassat annerpaartaat Mittarfeqarfinnut tunngavoq, taanna aamma ingerlaannaq pulaffiginissaa sulissutigissavara, Randi Vestergaard Evaldsen taama oqarpoq.

Vittus Qujaukitsullu naalakkersuisuuffigisimasani tigoqqissavai, tassa Inuussutissarsiornermut, Sulisoqarnermut, Niuernermut Nunanullu Allanut Naalakkersuisunngoqqissalluni.

Aamma atuaruk ASSIT Vittus Randilu akisussaaffeqarfimminnik paarlaateqatigiittut

Aningaasaqarnermut aatsitassanullu naalakkersuisuunini nuannertutut taagaluarlugit, qinersiffiup aallartiunnerani naalakkersuisuuffigisami urterfigeqqinnissai qilanaaraa.

 - Akisussaafferujussuarmik malitseqarnera taanna miserratissaanngilaq, taamaattumik akisussaaffiit allat suliffigeriikkakka uterfigeqqinnissaat aamma qilanaarivara, Vittus Qujaukitsoq taama oqarpoq, Randi Vestergaard Evaldsenimullu kaammattuuteqarluni.

 - Akisussaaffiit annertuut tigumminerini kikkulluunniit tamarmik oqaloqatigineqarsinnaasanngimmata saaffissai inuit ikitsunnguupput. Aamma tunuarsimaarutissanik ulikkaarpoq akisussaaffik taama annertutigisoq, taamaattumik oqaloqatigisinnaasassai killilerujussuummata Naalakkersuisooqatiminik atorluaanissaa tassani kaammattuutigiinnassavara,  Inuussutissarsiornermut, Sulisoqarnermut, Niuernermut Nunanullu Allanut Naalakkersuisoq, Vittus Qujaukitsoq taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat