Naalakkersuisut nassuiaaqquneqarput

Inatsisartuni ilaasortaatitat Siumumeersut, tassalu Ruth Heilmann aammalu Agnethe Davidsen isumaqarput, naalakkersuisut Qaanaami imigassamik matusinerat, nassuiarneqarnerusariaqartoq.

- Qaanaami innuttaasunik akisussaaffimmik arsaarinninneq tupaallannartoq pillugu Naalakkersuisut inatsisartunut nassuiaateqarnissaat kissaatigaarput, Inatsisartuni Ilaqutariinnermi ataatsimiititaliami siulittaasup tullia Ruth Heilmann, ataatsimiisitaliamilu ilaasortaq Agnethe Davidsen tusagassiutinut allagaqarnerminni taama allapput.

Siumut sinnerlugu inatsisartuni ilaasortaasut aamma piumasaraat, pilersaarutinik suugaluarnersunik Naalakkersuisunit piaarnerpaamik inatsisartunut paasissutissiisoqarnissaa.

Aamma Atassut sinnerlugu inatsisartuni ilaasortaq, Kristian Jeremiassen allappoq, Qaanaami imigassamik matusineq akuerineqarsinnaanngitsoq:

- Imigassamik pisinnaajunnaarnerup kingunerisarpaa allaanerusunik periarfissarsiulertarneq. Immialiorneq aallartinneqartarpoq, allat ulorianarnerit soorlu sprit-imik imernialunneq aallartinneqartarluni, taamaammat naalakkersuisut kaammattorusuppakka Qaanaami imigassamik matusinertik ingerlaannartumik atorunnaarsissagaat, Kristian Jeremiassen Atassut sinnerlugu inatsisartuni ilaasortaq taama oqarpoq.