Naalakkersuisut: Narsaarsuk eqqaalu misissuiffigineqassapput

Thulemi timmisartorsuup nakkarnerata kingunerisaanik Narsaarsummi plutoniumimik suli mingutsitsisoqartoq, ilisimatusarfiup Risø-p nalunaarusiaata takutippaa.

Naalakkersuisut marlunngormat ataatsimiinnerminni nalunaarusiap inerneri ilanngullugit sammivaat, tamarmiullutik isumaqatigiipput pingasunillu piumasaqaateqarlutik. Peqqinnissamut Avatangiisinullu naalakkersuisoq Asii Chemnitz Narup ima oqarpoq:

- Narsaarsuup nunataata qinngornernik ulorianartunik qanoq akoqartiginersoq misissorneqartariaqarpoq, silaannaalu misissorneqarnissaa aamma inassutigineqarpoq, soorluttaaq piumasarigipput immap uuumasui qanoq mingutsinneqarsimatiginersut misissorneqassasut, Asii Chemnitz Narup oqarpoq.

Peqqinnisaqarfiup pisortaa Søren Rendal Danmarkimi Peqqinnissamut ministereqarfimmik ulluni makkunani ataatsimeeqatiginnippoq.

Peqqinnissamut Avatangiisinullu naalakkersuisup, Asii Chemnitz Narupip, oqaatigaa pinngortitap inuillu imminnut qanittuunerannik Kalaallit Nunaanni isiginneriaaserput aallaavigalugu piumasaqaatit saqqummiunneqartut, aasaaneranilu misissuisoqartariaqarmat, suliaq nukinginnartuusoq:

- Isumaqarpunga una suliaq aammalu danskit naalakkersuisuinik isumaqatigiissuteqarnissaq nukinginnartoq aasaanerani qaammatit ukua atorluartariaqassagamik Narsaarsummi misissuinissamut, Asii Chemnitz Narup oqarpoq.