Naalakkersuisut naligiissaarinermut iluarsartuusseqqinnissaq kinguartikkumanngilaat
Kinguartitseqattaarnissamut pilersaaruteqarnatik Aningaasaqarnermut Nunamullu Namminermut Naalakkersuisoq Vittus Qujaukitsoq oqarpoq.
- Naalakkersuisut kommuuninut susassaqartunullu allanut naligiissaarinissamut aaqqiissuteqarnissaq piffissaliinerlu siornali aasakkut erseqqissumik oqariartuutigereernikuuaat, tassanilu nalunaarutigineqareerpoq naligiissaarinissaq aasaq manna pissasoq. Taamaattumik kinguartitseqattaarnissamik pilersaaruteqanngilagut.
Naligiissaarinermut iluarsartuusseqqinnissamik suliaq piffissaliinerlu kommuunit tamarmik paaseqatigiillutik decemberimili suleqataaffigigaat kommuunillu sisamassaanik ataatsimeeqatigineqartussaammata suliaq pipallatamik taaneqarsinnaanngitsoq, Naalakkersuisoq Vittus Qujaukitsoq erseqqissaavoq.
Akerlianik peqqissaarullugu qulaajaallunilu sulisoqarnerarpaa, tamakkuuppullu Naalakkersuisut, KANUKOKA-p kommuunillu sapaatiuppat oqaluuserisassaat.
Naalakkersuisoq aamma isumaqarpoq Kommuneqarfik Sermersuup Naalakkersuisunik tatiginnikkunnaarluni oqariartuutaa utertilluinnartariaqartoq.
- Isumaqarpunga apeqqut muminneqartariaqartoq. Qanoq ililluta uagut upperilersinnaavarput Kommuneqarfik Sermersuup aningaasatigut ullumikkut nalorninartumik ingerlanera qaangerniarlugu kommuunimit iliuuseqartoqarniarnera. Taamaattumik una sakkortuumik utertittariaqarpara.
Kommuneqarfik Sermersuup naatsorsuineri naapertorlugit naligiissaarinermut iluarsartuusseqqittoqarpat 138 million koruuninik isertitaqarsinnaavoq, ajornerpaamilli pisoqassappat 269 million koruunit annaasinnaavai.
Taamaattumik naligiissaarinermut iluarsartuusseqqinnissaq nakkaattoortitsisinnaasoq isumaqarput. Taamali oqassalluni sakkortuallaartoq Vittus Qujaukitsoq isumaqarpoq.
- Taama oqassalluni sakkortuallaaqaaq. Kommuneqarfik Sermersooq aningaasatigut nukillaarsarniarneqanngilaq. Kommuunip tigoriaannarnik aningaasaqarniarnera uagut Naalakkersuisuninngaannit ataatsimilluunnit iliuuseqarfigisinnaanngilarput. Taanna kommuunip nammineerluni akisussaaffigaa. Taamaattumik naligiissaarinermut iluarsartuusseqqinniarnermi killiffik Naalakkersuisunut ataatsimilluunnit pisuutitsiniutigineqarsinnaanngilaq, erseqqissaavoq.