Naalakkersuisut: Mittarfiit pillugit pilersaarut ukiakkut ataatsimiinnermi saqqummiunneqassaaq
Tamanna Inuit Ataqatigiinneersup Aqqaluaq B. Egedep Naalakkersuisut mittarfeqarnermut pilersaarutaat pillugit § 37 naapertorlugu aqqanilinnik apeqquteqaateqarneranut atatillugu akissuteqaammi atuarneqarsinnaavoq.
Knud Kristiansenip erseqqissarpaa mittarfinnut attaveqaatit qanoq ataqatigiissakkamik aaqqissuussaassanersut pillugu akissutinik ajornaatsunik paatsuugassaanngitsunillu soqanngitsoq, kisiannili attaveqaatit ataqatigiissutut, nunatsinnik tamarmiusumik ataqatigiissitsilluarnerusutut isigineqarnissaat naalakkersuisoqatigiit anguniagarigaat. Tamatumunnga atatillugu assartuussinermi aaqqiissutit ilivitsutut isiginiarnissaat, taamaalillutalu aamma umiarsuarmik, silaannakkut aqqusinertigullu assartuussinerit ataqatigiissinnissaannut periarfissanik eqqarsaateqarnissarput pingaaruteqartoq aamma oqaatigaa.
- Tamatuma peqatigisaanik Inatsisartut suliamut akuutinneqarnissaat Naalakkersuisunit kissaatigineqarpoq, taamaattumillu Inatsisartut sanaartornermut ataatsimiititaliaata 2015-imi upernaap ingerlanerani isumasioqatigiissinneqarnissaa, taamaalillunilu ataatsimiititaliap mittarfinnut aningaasaliinissamut pilersaarusiornermi siusissukkut akuutinneqalernissaa Naalakkersuisut naatsorsuutigaat, Knud Kristiansen taama allappoq.
AAMMA ATUARUK Qaqortumi mittarfiliornissaq pillugu nalunaarusiaq isumallualersitsinngilaq
Naalakkersuisut mittarfinnut tallimanut aningaasalersuinissamik pingaarnertut anguniagaqarnerat erseqqissaatigaa, tassalu Illoqqortoormiuni, ingerlatsinikkut sipaaruteqarnissaq anguniarlugu, Tasiilami, Islandimit takornariarfissatut periarfissat pitsaanerusumik atorluarneqarnissaat anguniarlugu, kiisalu Qaqortumi, innuttaasut angallanneqarnissamut pisariaqartitaannik naammassinninnissaq anguniarlugu.
Peqatigitillugu Nuummi mittarfik aamma annertusaavigineqassaaq angallasseriaatsinik pitsanngorsaanissaq anguniarlugu. Tamannalu Ilulissani mittarfik ilanngullugu Qeqertarsuup Tunuani takornarianut periarfissarpassuarnik atorluarnissamut periarfissiissaaq.
Knud Kristiansenip Aqqaluap B. Egedemut akissuteqaataani aamma atuarneqarsinnaavoq Naalakkersuisut Kangerlussuarmi mittarfiup matunissaanik pilersaaruteqanngitsut.
