Naalakkersuisut misissuivallaarsimanngillat
Tassami eqqartuussisuserisut aamma nittartagaqarput, nittartakkamilu malittarisassat allassimasut naapertorlugit kammeradvokatip naliliineri avammut saqqummiuteqqusaanngillat.
Naalakkersuisut suli angorusuppaat Nuna eqqartuussissuserisut nalunaarusiaata kammeradvokatimit nalilerneqarnissaa. Tassami Naalakkersuisut kissaatigimmassuk tamanna kimilluunniit attuumassuteqanngitsumit nalilerneqartariaqartoq.
Demokraatittaaq Inuit ataqatigiillu aamma uparuaapput kammeradvokati naalagaaffimmi atorfeqartuugami naalagaaffiup suliffeqarfiutaasa eqqartuussisutigut suliakkiissutaanik suliaqartuugami tamanna aningaasarsiaqaatigisarmagu pineqartunut taamak attuumassuteqartiginngitsoq.
Qarasaasiami nittartagaq www.kammeradvokat.dk iserfigaarput tassani eqqartuussisuserisut naalagaaffimmik sullissisut maleruagassaat atuarneqarsinnaavoq.
Kammeradvokatip suleqatigiinnissamut isumaqatigiissutaani allassimasoqarpoq naalagaaffiup nakerisarsiunngitsumik misissuisitsineri kammeradvokaatip avataani pisassasut.
Isumaqatigiissutillu taassuma ilaani aamma allassimasoqarpoq eqqartuussisuserisut suliassaat naalagaaffiit allat inatsisaat malillugit aaqqiiffigineqartussat kammeradvokatip suliassaanut ilaasassanngitsut.
Naalakkersuisut tusagassiuutinut nalunaarutaanni apriilip 14-iani nassiunneqartumi naalakkersuisut allapput, kammeradvokatip naliliilluni nassuiaataa naammassineqariarpat saqqummiunneqarumaartoq.
Kammeradvokatilli maleruagassaat naapertorlugu kammeradvokatip nassuiaataa naliliineralu tamanut saqqummiuteqqusaanngilaq taamaallaallu akunnerminniinnaq tamanna pisassasoq.
