Plastikkimik nioqqutissiat ataasiaannagassat nunatsinni pinngortitamik mingutsitseqataasut misissuinerni ersertoq, suliniutissanut pilersaarummi allaqqavoq. Tamannali maanna unitsinniarneqalerpoq.Assi: lisa borbély/flickr

Naalakkersuisut milluaatit vatpindillu plastikkit inerteqqutigineqalersikkusukkaat

Naalakkersuisut mingutsitsinnginerunissamut suliniutissanut nutaamik pilersaarusiorput. Plastikkimik nioqqutissiat ataasiaannagassat 2022-mi inerteqqutigineqalertariaqartut, suliniutissanut pilersaarummi allaqqavoq.

Nunatsinni pinngortitaq imarlu platikkimik nioqqutissianik ataasiaannagassanik soorlu vatpindinik milluaatinillu eqqaaviussanngilaq. 

Taamaammat plastikkimik nioqqutissiat ataasiaannagassat arlallit 2022-mi inerteqqutigineqalersikkusutaasa ilagaat. 

Nerinermut atortussat ataasiaannagassat plastikkit eqqussat amerlassusaat: 
Nerinermut atortussat ataasiaannagassat plastikkit ukiumut 10,5 tonsit eqqunneqartarput. 

Naalakkersuisut paasissutissat Pisiffimmeersut tunngavigalugit taama missiliuipput. 

Plastikkimik nioqqutissiat ataasiaannagassat allat eqqussat qassiunersut ilisimaneqanngilaq.

Tamanna Naalakkersuisut plastikkinik atuinerup annikillisinnissaanut suliniutissanut pilersaarutaanni tusarniaassutigineqaqqammersumi allaqqavoq.

Plastikkimik nioqqutissiat ataasiaannagassat nunatsinni pinngortitamik mingutsitseqataasut misissuinerni ersertoq, suliniutissanut pilersaarummi allaqqavoq.

Tamannali maanna unitsinniarneqalerpoq.

AAMMA ATUARUK Arfeq qaqutigoortoq plastikkinik nerisaqarsimallunilu puaani parasitsiseqartoq

Soqutiginnittorpaaluit tusarniaanermut tapersiupput, taakkualu ilagaat Pinngortitaq pillugu nunarsuaq tamakkerlugu suliniaqatigiiffik. Atuisut plastikkimik nioqqutissianik ataasiaannagassanik atuiunnaarnissaannut ikiorneqarnissaat pingaaruteqartoq, suliniaqatigiiffik isumaqarpoq.

- Ermutsinut, nerinermut atortussanut vatpindinullu plastikkinut taarsiunneqarluarsinnaasut pisiniarfinni nioqqutaalereernikuupput, nioqqutissalli tamakkua plastikkiusut saniannut inissinneqakkajummata atuisut sorlernik pisinissartik aalajangeruminaatsittarpaat.

- Ileqqut iperaruminaattarnerat akiisalu nikingassutaat pinngortitamik mingutsitsisut pisiarineqakkajukkunartut, suliniaqatigiiffikl tusarniaanermi akissummini allappoq.

EU-mi aamma inerteqqutigineqangajalertut

Plastikkimik nioqqutissiarpaaluit ataasiaannagassat EU-mi aamma inerteqqutigineqalerneranni inerteqqutigineqalernissaat siunertaavoq. 

Eqqakkat Europami sissanut tippussaasimasut 70 procentiisa missaat EU-Kommissioni naapertorlugu plastikkimik nioqqutissiaapput  ataasiaannagassat soorlu vatpindit, ballonngilerfiit amitsukujuut nerinermullu atortussat. 

Paasisaqarfik: Naalakkersuisut

Naalakkersuisut plastikkinik atuinerup annikillisinnissaanut suliniutissanut pilersaarusiornissaat, Inatsisartut siorna aalajangerpaat. 

Pilersaarusiaat tusarniaassutigineqaqqammerpoq, suliniutinullu pilersaarutaat politikkikkut suli akuerineqarani.

Nioqqutissiat allat aamma inerteqqutigineqalersinnaasut

Kisianni vatpindit, milluaatit ballongilerfiillu amitsukujuut plastikkit nunatsinni pisiniarfinni nioqqutaaqqusaajunnaartussani kisiartaassanngitsut, Naalakkersuisut isumaqarput.

Puussiaaqqat plastikkit pisiniarfinni akeqanngitsumik pineqarsinnaasut aamma inerteqqutigineqalersikkusuppaat. 

Naalakkersuisut taakkua 2023 nallertinnagu inerteqqutigineqalersikkusuppaat - eqqiluisaarnermulli tunngatillugu atorneqarsinnaasassallutik.

AAMMA ATUARUK Tasiusami eqqakkat ajornartorsiutaaqqilersut

Puussiaaqqat taakkua inerititanut naatitanullu atornissaat Danmarkimi inerteqqutigineqanngitsut, suliniutissanut pilersaarummi erseqqissarneqarpoq.

- Taamaammat puussiaaqqanik plastikkinik inerititaasivinuinnaq naatitaasivinuinnarlu inissiisoqartarnissaa, aammalu innuttaasut inuussutissarsiortullu inerteqqutigineqalersikkusunnerisa siunertaannik qaammarsaavigineqarluarnissaat pingaaruteqarpoq, Naalakkersuisut allapput. 

Taamaammat innuttaasut puussiaaqqat plastikkit sunut atorneqartassanerannik paasiuminartumik qaammarsaavigineqarnissaat suliniutissanut pilersaarut naapertorlugu pisariaqarpoq. Tamanna vatpindit milluaatillu plastikkit assigalugit politikkikkut suli akuerineqanngilaq. 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat