- Coronamut akiuussutissaq sakkussatuaavoq, taamaammat akiuussutissamik kapitittoqarnissaa kaammattuutigaarput, Kirsten Fencker oqarpoq.Assi: KNR

Naalakkersuisut: Meeqqat 12-ileereersimasut maanna akiuussuserneqassapput

Meeqqat 12-it 15-inut ukiullit coronamut akiuussutissamik maanna aamma neqeroorfigineqassapput

Meeqqat 12-it 15-illu akornanni ukiullit covid-19-imut akiuussutissamik maanna aamma neqeroorfigineqassapput

Peqqinnissamut naalakkersuisoq, Kirsten Fencker (Naleraq) tusagassiortunik katersortitsinermi oqarpoq.

Nunatsinni tunillatsissimasut maanna amerlangaatsiarput: Coronamik tunillatsissimasut maanna 46-pput.

Kisitsisilli allanngoraannaavipput - peqqissisoqartarlunilu tunillatsittoqartarpoq.

AAMMA ATUARUK Fire nye corona-smittede i Sisimiut: Smittekilden er ukendt

- Coronamut akiuussutissaq sakkussatuaavoq, taamaammat akiuussutissamik kapitittoqarnissaa kaammattuutigaarput, Kirsten Fencker oqarpoq.

Tunillatsissimasut 46-t sumiippat?

Sisimiuni sisamat

Aasiaat 19-it

Nuummi sisamat

Qasigiannguani ataaseq

Tasiusami arfineq-pingasut

Upernavimmit qulit
 
Kisitsisilli allanngoraannavipput. Napparsimasut peqqisseqqittarput nutaanillu tunillatsittoqalertarluni. 

Europami Nakorsaateqarnermut Aqutsisoqarfiup, EMA-p meeqqanut akiuussutissamik kapuinermik misissuivoq. Paneeraq Noahsenillu Nakorsaaneqarfimmi nakorsap oqarnera naapertorlugu Pfizer/Biontechimit aamma Modernamit akiuussutissamik meeqqanut 12-ileereersimasunut ajoqutaanngitsumik  kapuisoqarsinnaasoq misissuinerup takutippaa.

- Meeqqat kapitiffikkut ippigisaqassapput, timikkullu inersimasutulli sunniutinik malugisaqassallutik – tamannalu qaangerneqartarpoq.

- Nunani allani meeqqanut 12-ileereersimasunut akiuussutissamik kapuineq qangali aallartereerneqarnikuuvoq, tamannalu meeqqqanut illersuisoq uppernarsarneqarpoq. Tunillatsikkaangamik akiuussutissamik kapitereersimanertik pissutigalugu napparsimannginnerusarput aamma angajoqqaaminnut aanaakkuminnulluunniit, suli napparsimanerusinnaasunut tunillaassuinnginnerusarlutik, Paneeraq Noahsen oqarpoq.

- Akiuussutissaq meeqqanut illersuutaalluarlunilu tunillaassuinermut uniffiliisarpoq.

Inuiaqatigiinni ataatsimoortumik akiuussuserneqarnissaq ungasittoq

Meeqqanut akiuussutissamik sapaatip-akunnerata tulliani neqerooruteqartoqalernissaa taassuma naatsorsuutigaa.

- Maannakkut pilersaarusiorparput, nakorsaq oqarpoq.

Nunatsinni innuttaasut nappaammut illersuutissaqalernissaat anguniarlugu innuttaasut 80 procentiisa akiuussutissamik kapitissimassapput - 80 procentilli angunissaanut suli kapuisoqangaatsiassaaq. Nunatsinni 47 procentiinnaat maanna tamakkiisumik akiuussutisserneqarsimapput.

80 procentit angunissaanut qanoq iliornissarsi eqqarsaatigaasiuk?

- Aamma ajornakusuulaassaaq, Paneeraq Noahsen nassuerpoq.

- Akiuussutissamik neqeroorummik akuersisimanngitsut akuersinissaat sakkortuumik kaammattuutigaarput.

Nunatsinni akiuussutissamik kapitissimasut
  • Innuttaasut 65 procentii Pfizer/Biontechimeersumik Modernameersumilluuniit siullermeertumik kapitissimapput.
  • 47 procentit tamakkiisumik akiuussuserneqarsimapput.
  • 40 procentit suli akiuussutissamik kapitinneqanngillat.
  • Akiuussutissaq Modernameersoq atorneqarneruvoq.
  • Akiuussutissap aappaa siullermik kapitinnermit ullut 28-t 43-llu ingerlaneranni pissarsiarineqassaaq.

- Innuttaasoqassutsimut atatillugu meeqqat amerlasoorujussuupput, taamaammat 80 procentit angunissaat aamma ajornakusuussaaq, kisitsisilli allanngorarput - kisitsisit appasinnerutillugu aamma sulinikuuvugut. Coronalli ilaata Deltap nunatsinniinnera amerlanerusullu tunillatsinnerat pissutigalugit 80 procentit anguniarnissaat sulissutigaarput. Akiuussutissarlu sakkussatuaraarput.

  • Inuiaqatigiinni ataatsimoortumik akiuussuserneqarsimaneq innuttaasunit amerlassutsit aalajangersimasut nappaammik tunillatsereersimaneratigut, akiuussutissaqalerneratigut imaluunniit akiuussutissamik kapitissimanikkut tunillatsissinnaajunnaarneratigut anguneqartarpoq.

Nunatsinni 16-ileereersimasut akiuussutissamik kapitinnissamut maanna neqeroorfigineqareerput.

Danmarkimi meeqqat 12-init 15-inut ukiullit coronamik akiuussutissamik juulip ulluisa 14-ianni neqeroorfigineqartalerput.

Tunillatsissimasut juulimi amerlingaatsiartut

Tunillatsissimasunik nalunaarsuinerit arlaleriarluni 0-imiissimavoq - kisitsit taanna juulip aallaqqaataani aamma 0-imiippoq - tunillatsissimasulli tamatuma kingorna amerliartuinnalerput. Tuniluunneq Ilulissani, Nuummi Qaqortumilu aallartippoq - tunillatsissimasullu taakku tamarmik nunatsinnut Københavnimiit timmisartorsuarmut juulip ulluisa arfernanni marlunngornermi ilaaqatigiissimallutik.

Taakku coronamik tuniluutianerusumik deltamik tunillatsissimasuupput, tuniluunnerlu sineriammi illoqarfinnut siaruaappoq.

Tamatuma kingunerisaanik killilersuinerit sukannersut tassa inuit amerlanerpaamik 20-oqqusaanerat kikkullu tamarmik tamanit ornigarneqartuni qanermut assiaquteqaqqusaanerat atuutilersinneqarput.

AAMMA ATUARUK Tunillatsissimasut nutaat arfineq-pingasut: Tuniluuttoqarnissaanut aarlerinartoqartoq

Malittarisassalli taakku nunatsinni sumiiffinni amerlanerpaani arfininngornermi atorunnaarsinneqarput. Taakkununngalu taarsiullugu tamakkiisumik akiuussuserneqarsimanermut uppernarsaat imaluunniit coronamik tunillatsissimannginnermut uppernarsaat sivisunerpaamik akunnernik 48-nik pisoqaassuseqartoq atorlugit neriniartarfimmut, timersortunut, imerniartarfinnut, atuakkanik atorniartarfimmut, filmertarfimmut allanullu aatsaat isertoqarsinnaalerpoq.

Pisiniarfimmut atuarfimmulluunniit iserniaraanni tunillatsissimannginnermut uppernarsaateqarnissaq tamakkiisumilluunniit kapitissimanissaq piumasaqaataanngilaq.

Aasianni, Upernavimmi Upernaviullu nunaqarfiini piffissami matumani aqunneqarsinnaanngitsumik tuniluuttoqarnera pissutigalugu malittarisassat atuutiinnarput.

Isummersuutit

Nunatsinni coronavirusi pillugu
killiffik

Tunillatseqqasut 126  
Ullumi tunillatsittut 35  
Siullermik kapitissimasut 40.955  
Aappassaa kapitissimasut 35.924  
Tunillanneqarsimasut 504  
Uninngasut 1  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Septembarip 21-iat 12:00
 

Coronavirusimik tunillatsinissaq pinaveersaaruk