Naalakkersuisut Kujataani angalalersut

Narsaq, Alluitsup Paa, Nanortalik, Qaqortoq, Igaliko aamma Qassiarsuk tikinneqassapput. Innuttaasunik ataatsimiisitsisoqarnissaa siunertaavoq, ataatsimiisitsinerillu Inatsisartut ukiaanerani septembarip 13-ianit ataatsimiinnissaannut atatillugu piareersaataallutik.

Aalajangiiffigisassalli imaannaanngitsuusut, naalakkersuisup Jens-Erik Kirkegaardip oqaatigaa:

- Ukiaq manna annertuunik aalajangiiffissaqarfiuvoq. Ukiaanerani ataatsimiinnermi ilaatigut oqallisigineqassapput Annertuumik suliaqarnermi Inatsisip allanngortinnissaa, kiisalu akuersaanngilluinnarnerup taamaatinneqarnissaanut tunngaviusumik aalajangernissamut siunnersuut. Sammisat tamakku qineqqusaarnermi oqallisigineqangaatsiarput maannalu piviusunngortinneqassallutik, Jens-Erik Kirkegaard oqarpoq, sammisallu tamakku pingaaruteqartut innuttaasunut toqqaannartumik oqallisigineqarnissaat erseqqissaatigalugu.

Piiaanissamut London Miningimut akuersissut naammassineqangajalersoq kujtaani innuttaasunik oqaloqateqarnermi aallaaviussapput, pilersaarutillu allat marluk maanna tusarniaassutigineqartut - tassalu Qeqertarsuatsiaani rubinisiorluni pilersaarut kiisalu Kujataani Killavaat eqqaanni saffiugassat qaqutigoortut.

Aatsitassanut tunngasut saniatigut sammisassat ilagaat suliffissaaleqinermik akiuiniarneq, ilinniartitaaneq aamma ilaqutariinnermut tunngasut.

Innuttaasunik ataatsimiisitsineq siulleq Narsap katersortarfiani aqagu marlunngornermi unnukkut nalunaaqutaq arfineq-marlunut aallartissaaq, qulingiluallu tungaanut ingerlasussatut naatsorsuutigineqarluni.

Alluitsup Paani atuarfimmi pingasungornermi ullaap tungaani ataatsimiisitsisoqassaaq, Nanortallillu katersortarfiani unnukkut ataatsimiisitsisoqassalluni.

Qaqortumi Puilasumi sisamanngornermi unnukkut ataatsimiittoqasssaaq, Igalikullu katersortarfiani tallmanngornerup ullaap tungaani ataatsimiittoqassalluni.

Innuttaasunik ataatsimiisitsinerit naggaserlugit Qassiarsummi Café Brattahlidimi tallimanngorpat ualikkut ataatsimiittoqarumaarpoq.