Naalakkersuisut Korea kujallermut tikeraarput
Korea Kujallermut tikeraarneq Korea Kujallermi Præsidentip septembarimi nunatsinnut tikeraarneranut akiniaaneruvoq.
Korea Kujallermut pisortatigoortumik tikeraarnermi pingaarnerutinneqartussat tassaapput aatsitassat, niuerneq ilisimatusarnerlu.
Tikeraarnermi Korea Kujallermiut nunatsinnut septembarimi tikeraarmata suleqatigiilersinnaaneq pillugu paaseqatiginnissut atsioqatigiissutigineqartoq pillugu oqaloqatigiinnerit ilaatigut nanginneqassapput, Nunanut Allanut tunngassuteqartunut Pisortaqarfimmi immikkoortortami pisortaq, Mininnguaq Kleist, oqarpoq.
Kalaallit Nunaata Korea Kujalliullu ilisimatuussutsikkut suleqatigiinnissaat pillugu atsioqatigiittoqassasoq, Mininnguaq Kleist oqarpoq, taamaattumik ilinniartitaanermut Naalakkersuisoq, Palle Christiansen, angalanermi peqataassaaq.
Kalaallit Nunaanni inuussutissarsiornikkut suliaqartut angalanermi peqataassapput. Royal Greenland aamma Great Greenland angalaqataassapput. Kalaallit kulturiannik Korea Kujallermiut takusaqarlutillu misigisaqartinneqassapput.
Erinarsortartoq, Nive Nielsen, nipilersortartut Deer Children, nipilersortoralugit tusarnaartitsissapput, Korea Kujallermilu TV-kkut aallakaatitami peqataassallutik. Filmi "Inuk" Kalaallit Nunaat sinnerlugu pisortatigoortumik Korea Kujallermut tikeraarnermi takutinneqassaaq.
Korea Kujallermut tikeraarneq annertunerusumik illoqarfiit pingaarnersaanni Seoul-imi pissaaq, ullullu qulit missaannik sivisussuseqassalluni.