Naalakkersuisut KNAPK-mit taperserneqarput
- Naalakkersuisut isumaqatigilluinnarpavut, aamma taakku isumaqarmata Royal Greenland Nunatsinni aalisarnerup aaqqissuuteqqinnissaanut uummaarissumik peqataanissanik angallatinullu aningaasalersuisarnini nalileqqittariaqarai kaammattuutimmassuk, KNAPK-mi siulittaasoq, Leif Fontain oqarpoq.
Royal Greenlandimi siulersuisut aningaasaqarnikkut periarfissanik nalilersueqqeqqullugit Naalakkersuisut kajumissaarpaat.
Aalisarnermik inuussutissarsiutillit Royal Greenlandilu assigiimmik siunertaqassanngillat. Royal Greenland aningaasatigut annertuumik ajornartorsiuteqalissagaluarpat aalisartut kalluarneqassasut, Naalakkersuisut siulittaasuat, Kuupik Kleist, qanittukkut nassuiaavoq.
Angallatit qassit suliffeqarfissuup aningaasaleeqataaffigisimanerai suliffeqarfiup isertugaatigaa. KNR-illi aalisartunit paasivaa, Uummannami, Ilulissani Qasigiannguanilu angallatit arfineq-pingasut, taavalu Upernaviup eqqaani aqqaneq-marluk aningaasaleqataaffigisimagai, Upernavik Seafoodimi aktiaateqarnermigut.
