Naalakkersuisut kingusinaarlutik pakasaallutillu qinnuteqarput

Piniartut isorliunerusuniittut aningaasatigut tapiiffigineqarnissaannut naalakkersuisut aningaasaqarnermut ataatsimiititaliamut qinnuteqarnerat kingusippallaarpoq, juullertinnagu piniartunut agguaanneqarnissaannut, taamatut oqarpoq inatsisartut aningaasaqarnermut ataatsimiititaliaani siulitaasoq Augusta Salling Atassut
Allattoq Jaaku Lyberth
decembarip 22-at 2007 17:11

Qinnuteqaateqarnermi paasissutissat pisariaqartinneqarneqartut naammattut naalakkersuisut suliarisimanngilaat.

Qinnuteqarnermut atatillugu apeqqutit assigiingitsut naalakkersuisuinit akineqarnissaat pisariqarpoq, akineqareerpatalu qinnuteqaat suliarineqassaaq, Augusta Salling oqarpoq. Piniartunut tapiinissamut uppernarsaatit pisariaqartinneqartut aningaasaqarnermut ataatsimiititalimit qulakkeerlugit pisariaqartinneqarput. Siornatigut piniartunut tapiinissamut qinnuteqaateqartoqarnerni, aningaasaqarnermut ataatsimiititalianut qinnuteqartarnerni, piumasaqaataasut naalakkersuisut naammassisimanngilaat, aningaasaqarnermut ataatsimiititaliap siulittaasua oqarpoq. Nalakkersuisut pakasaallutik qinnuteqarput, qinnuteqaallu tallimanngormat anigaasaqarnermut ataatsimiititaliami suliarineqarpoq, kissaatigineqanngilarlu pipallataasumik qinnuteqaatip suliarineqarnissaaq. Tallimangormat qinnuteqaat akuerineqarsimagaluarpalluunniit, tapiissutit kommuninut taamatullu piniartunut tunniunneqarnisaannut anngussimanavianngikkaluarput, Augusta Salling oqarpoq.

Inatsisartut aningaasaqarnermut ataatsimiititaliaa ukiortaareerpat ataatsimiissaq, naatsersuutigineqanngilaq ukiutoqqap ukiortaallu akornanni qinnuteqaat suliarineqarsinnaassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq