Naalakkersuisut: Kikkulluunniit mattassisinnaasariaqarput
- Tassa taanna suliaq nalilersorlugu ingerlapparput. Aamma isumaqarpugut ullutsinni akit minnerunngitsumik pisiniarfinni kalaalimerngit akii pissakinnerusunut, taavalu allatigut immaqa utoqqalinersiaannalinnut unamminartorujuusinnaapput naammattusaarineq annertusinnaalluni. Taamaalilluni nalilersortariaqarparput Nunatsinnut pitsaasumik qanoq eqqunneqarsinnaanersoq, Inuussutissarsiornermut Aatsitassanullu Naalakkersuisoq, Jens-Erik Kirkegaard (S), oqarpoq.
Qilalukkap mattaa Brugsenimi imaluunniit Pisiffimmi ullumikkut kilomut 450 koruuneqartoq, qullukkat Brugsenimi kilomut 700 koruuneqartut Pisiffimmi 650 koruuneqarput:
- Minnerunngitsumik kalaalimerngit pisiniarfinni akiisa qaffasinnerpaaffissaat eqqarsaatigalugu aamma innuttaasut amerlanerpaartaasa akilersinnaasaannik, ujartuisinnaagaanni nassaarlunilu periutsimik, taassuma eqqunnissaa sulissutigisatta pingaarnerit ilagivaat, Jens-Erik Kirkegaard oqarpoq.
Kalaallit Nunaanni Brugsenimi pisortaaneq, Susanne Christensen, KNR-imut ilisimatitsivoq Kalaallit Nunaanni Brugsenip Naalakkersuisut kalaallimerngit niuertarfinni akiisa qaffasinnerpaaffilernissaannut pilersaarutaannik tusagaqarsimanatik. Taamaammallu aamma oqaatigisinnaannginnerarpaa kalaaliminernik nioqquteqarnerminnut qaffasinnerpaaffiliisoqassappat qanoq kinguneqarumaarnersoq:
- Tamakkua ernumanarsinnaapput assigiinngitsut. Aamma pitsaaquteqarsinnaapput. Taamaammat nalilersuineq taavalu periutsimik pitsaasumik, aamma soorunalimi pisiniarfinnut imatut annaasaqaataasussaanngillat nioqqutaataat, kisiannili aamma illuatungaatigut kalaalimerngit taakkua innuttaasunut akilersinnaasumik ingerlasinnaanissaat aamma ujartortariaqarparput, Jens-Erik Kirkegaard oqarpoq nangillunilu:
- Uani oqimaalutaanissaq pingaarutilerujussuussaaq. Innuttaasunut pitsaaneq nassaarisariaqarparput, kisianni soorunalimi pisiniarfiit nammakkernagit. Kisianni nalilersuineq tassani ingerlattariaqarput aamma Nunatta pissarititaanik atorluaanerunissamik aqqutissiuisinnaammat, Jens-Erik Kirkegaard oqarpoq.
Jens-Erik Kirkegaardip ilanngullugu oqaluttuaraa kalaalimerngit akiinik qaffasinnerpaaffiliinissamut Naalakkersuisut misissuisitsilernerat aatsaat aallarteqqammertoq, taamaammallu suli oqaatigiuminaatsoq inatsisissatut siunnersuut Inatsisartunut qaqagu saqqummiunneqarumaarnersoq.
