Naalakkersuisut isumaqatigiinnginnerat illuatungiliuttut tupaallaatiginngilaat

Puisit amiinik Canadameersumik nunatsinnut eqqussuineq Naalakkersuisunut ilaasortat iluminni isumaqatigiinngissutigaat tusarlugu illuatungiliuttut tupaallaatiginngilaat.

Naalakkersuisut siulittaasuata tullia Josef Motzfeldt puisit amiinik Canadamit pisisarnerup unitsinneqarnera isumaqatiginagu ippassaq oqareersorlu, Naalakkersuisut siulittaasuat avammut ataatsimik nipeqarnissaq anguniarlugu naalakkersuisooqatigiinnik aggersaavoq, kinguneraalu Josef Motzfeldtip inissinneqarnera. Inatsisartuni illuatungiliuttunit Per Berthelsen-imit inissiineq pissusissamisoorsorineqaraluarluni taamaattooq naalakkersuisooqatigiit atangaatsiarnissaat qularineqarpoq.

- Neriuppunga suliassaq imaannaanngikkunaraluaqisoq naalakkersusisut siulittaasuata pisussaaffini malillugu ukua naalakkersuisooqatini sakkortuumik inississagai, tassami suleqatigiinnissaq aalajangiunnikuuaat. Nunattalu akisunaarujussuassanngippagu suleqatiginnerat ingerlasaniartariaqarpoq.

Ataannarnissaat takorlooruminaakkaluartoq, kisianni oqareernittut, neriuutigeqaarput ataniarsarissasut, nunatta akisunaarpallaaleqimmagu ikerinnakkut qinerseqattaartarneq, Per Berhelsen oqarpoq, nangillunilu oqarluni, naalakkersuisooqatigiinni inissiineq una kuseriarnerinnaasoq, qularnanngimmat siunissami arlaleriaqaluni pisarumaartoq.

Inatsisartuni illuatungiliuttup allap, Kattusseqatigiit Partiiata siulittaasuata Anthon Frederiksenip naalakkersuisooqatigiit pakatsissutigai.

-Naalakkersuisoqatigiit kalaallinut inuiaqatigiinnut illersuisumik nipeqartumik pingaartumillu aalisartunut piniartunullu illersuisumik nalunaarnerat, naalakkersuisut ilaaninngaanniit akerlilerneqarnera assorujussuaq pakatsinarpoq. Tassa maani nunatsinni tupinnanngitsumik kalaallit innuttaaqativut Kalaallit Nunaannilu najugaqartut taakkuusariaqarmata naalakkersuisut sernersorlugillu illersugassaat, Anthon Frederiksen oqarpoq.