Naalakkersuisut isornartorsiuinermut akissuteqarput

- Namminersorneq pillugu Allattoqarfiup suliassaraa Namminersorneq pillugu Isumalioqatigiissitap innersuussutai unneqqarissumik tunniusimasumillu innuttaasunut paasititsiniutigissallugit, naalakkersuisut siulittaasuat allappoq, nangipporlu:

- Namminersorneq pillugu Allattoqarfiup suliassarinngilaa isumaliutissiissut isornartorsiussallugu. Aamma Namminersorneq pillugu Allattoqarfiup suliassarinngilaa isumaliutissiissutip imarisaa politikkikkut isummersorfigissallugu, kisiannili pissutsit piviusorsiortut tunngavigalugit aammalu Isumalioqatigiissitap innersuussuteqarnermini tunngavilersuutigisaanut ataqatigiissillugit, Hans Enoksen allappoq.

Paasititsiniaaneq pillugu videoliaq KNR-TV-kkut aallakaatinneqaqqammersoq, Demokraatit siulittaasuannit Jens B. Frederiksenimit isornartorsiorneqarpoq, videoliarlu KNR-imit uparuarneqarsimanersoq, Jens B. Frederiksenip apeqquteqaatigaa:

- Namminersorneq pillugu Allattoqarfik TV-kkut innuttaasunut paasissutissatut aallakaatitassiat aallakaatinneqartarnerisa aallartinnginnerini KNR-mi oqartussaasunik oqaloqatiginneqattaarpoq. Oqaloqatiginninnerni KNR-p erseqqissaatigaa KNR-p pisussaaffigigaa aallakaatitat kingornagut tusagassiornikkut piareersarluagaasumik isornartorsiuisumillu oqallinnernik ingerlatsissalluni. Namminersorneq pillugu Allattoqarfiup KNR-mik, naalakkersusiut siulittaasuat Hans Enoksen Namminersornerullutik Oqartussat nittartagaanni allappoq.