Nunatsinni inuusuttut atuarnerminnik ilinniarnerminnilluunniit naammassinnikkiartorlutik Danmarkimut utersinnaanngortut, Naalakkersuisut ilisimatitsipput.Assi: PR foto

Naalakkersuisut: Inuusuttut Danmarkimut ilinniarfimminnukaqqissinnaapput

Nunatsinni inuusuttut Danmarkimi atuarfimminnut ilinniarfimminnullu naammassinnikkiartorlutik utersinnaanngorput.

Danmarkimi atuarfippassuit ilinniarfippassuillu qaammatini marlunni matoqqareerlutik ataasinngornermi maajip ulluisa 18-ianni ammaqqissapput.

Tassa imaappoq, nunatsinni inuusuttorpaaluit ilinniarnertik atuarnertillu nangikkiartorlugu Danmarkimut utersinnaanngorput. Naalakkersuisut taama ilisimatitsipput.

AAMMA ATUARUK Danmarkimi efterskolet ammaqqilerput: Atuartut nunatsinneersut uteqqusaanersut nalunarpoq

Danmarkimi soorlu efterskolit, højskolit, inuussutissarsiutinik ilinniarfiit suliamillu ilinniarfiit, tassa lærlingeqarfiillu allat pineqarput.

Taakkuli sumiiffii qanorlu periuseqarluni ammaqqissaneri assigiinngisitaarput.

- Taamaammat qaqugu ammaqqissanersut qaqugulu aallartoqarsinnaanersoq paaserusukkaanni atuarfigisaq ilinniarfigisarluunniit attavigineqassasoq kaammattuutigineqarpoq, Naalakkersuisut ilisimatitsipput.

Danmarkimut angalanissamut nammineq inniminniinak 

Danmarkimut timmisartorluni angalanissamut bilitsimik nammineq inniminniisoqassanngitsoq, oqartussanit aamma inassutigineqarpoq.

Atuarfigisaq ilinniarfigisarluunniit qaqugu ammassanersoq paaserusukkaanni taakku arlaat attavigineqassasoq kaammattuutigineqarpoq.

AAMMA ATUARUK Danmarkimi efterskolertut: Ikinngutivut maqaasivagut - Brugsenimillu ujariatsilluta

Taamaalioreeraanni Danmarkimut angalanissamut tunngatillugu nunatsinni ilinniarfeqarfik, Majoriaq Danmarkimiluunniit Kalaallit Illuutaat attavigineqassapput.

Nunatsinniit Danmarkimi efterskolertut efterskolinut aqutsisoqarfimmut e-mailadressemut uunga allallutik saaffiginneqquneqarput: efterskole@nanoq.gl, imaluunniit oqarasuaatit normuinut ukununnga sianerlutik +299 346755 imaluunniit +299 346754.

Isummersuutit