Sulisitsisut akunnittarfinnut, neriniartarfinnut takornariartitsinermullu ataatsimiititaliaata siulittaasuata Helge Tangip oqarnera naapertorlugu akunnittarfiit killilersuinerit peqqutaallutik aggustimi angummaniapiloortuarsinnassapput.

Naalakkersuisut inuussutissarsiornermut ikiorsiinermik sivitsuinissamik isumaliuteqartut

Qanittukkut isumaqatigiissuteqarnissarput ilimagaarput. Inuussutissarsiornermut naalakkersuisoq Jens-Frederik Nielsen taama oqarpoq.

Inuussutissarsiornermut qaammatip matuma naanerani ikiorsiisoqarunnaarpat inuussutissarsiortut qanoq ikiorneqassappat?

Naalakkersuisuit Inatsisartullu aningaasaqarnermut akileraartarnermullu ataatsimiititaliaat apeqqut taanna akiniarsarileruttorpaat.

Naalakkersuisut aamma aningaasaqarnermut akileraartarnermullu ataatsimiititaliap ikiorsiineq sivitsorniarsarileruttoraat, inuussutissarsiornermut naalakkersuisup Jens Frederik Nielsenip Demokraatineersup allakkatigut akissummini ilisimatitsivoq.

- Naalakkersuisut ikiorsiissutit sivitsorniarlugit sulimmata suliniutinillu nutaanik eqqarsaateqarmata ilumoorpoq.

- Inuussutissarsiornermut ikiorsiineq sivitsussaneripput, taamaaliussaguttalu ikiorsiinerit qanoq sivitsortigissanerigut taavalu allatigut ikiorseeqqissanersugut inaarutaasumik suli aalajanginngilarput. Qanittukkut inaarutaasumik aalajangiissangavugut, Jens Frederik Nielsen akissummini allappoq.

Aasaanerani ulapaarfik ajalusuulersoq  

Inuussutissartunut marsip qaammataani ikiorsiissutaagallartut atuutilerput.

Tamanna takornarialerisut akunnittarfiliutillillu coronap upernaami ajornartoortitsinerani ajalusuunnginnerannik qulakkeerinneqataavoq. Sulisitsisut akunnittarfinnut, neriniartarfinnut takornariartitsinermullu ataatsimiititaliaata siulittaasua, Helge Tang, taama naliliivoq.

AAMMA ATUARUK Nunatsinni inuussutissarsiornermut ikiorsiissutit ima ipput

- Inuussutissarsiortunut ikiorsiisoqarsimanngikkaluarpat, taakkua ilaasa suliffeqarfiutaat matusimassagaluarput, Helge Tang oqarpoq.

Takornarianik juunip ulluisa 15-ianniit nunatsinnukaqqittoqarsinnaalerpoq, imaaliallaannarli nunatsinnukartoqarsinnaanani.

Aallartigatik coronavirusimut misissortinnerminni tunillanneqarsimanngitsutut uppernarsaammik pissarseqqaassapput, nunatsinnullu tikikkunik allanik killilersuiffigineqassallutik. Tikikkunik ulluni tallimani isersimaannarallassapput. Tamatumalu kingorna misissorteqqissapput, aatsaallu tunillanneqarsimanngikkunik aneqqusaalissallutik.

Akunnittarfiit killilersuinerit peqqutaallutik aatsaat aggustip aallartinnerani ataavartumik unnuisoqaqqittalissasut, Helge Tangip ilimagaa. Taamaakkaluartoq angummaniapiloorallassapput.

AAMMA ATUARUK Ulloq kiisami aalajangerneqarpoq: Nunarput juunip 15-iani ammaqqissaaq

- Nunatsinneersunik takornariaqarataannaavugut, taakkuali takornariarisartakkatsinnit ikinnerungaatsiassangatippavut, Helge Tang oqarpoq.

Nunatta ammaqqikkiartuaarnerata immikkoortua siulleq juunip ulluisa 15-ianni atuutilerpoq. Sapaatit akunnerannut amerlanerpaamik 600-t timmisartorlutik nunatsinnukarsinnaapput.

Nunatta ammaqqikkiartuaarnera pingasunik immikkoortoqarpoq, immikkoortulli kingulliit qaqugu atuutilissanersut suli aalajangerneqarani.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat