Naalakkersuisut innarluutillit sullinneqarnerat nukittorsarniarpaat

Innarluutilinnik suliaqartut ilinniartitaanissaat sulisullu piginnasaasa qaffassarneqarnissaat aamma pineqarput.
Allattoq Jaaku Lyberth
septembarip 04-at 2014 03:48

Naalakkersuisut Inatsisartut 2015-imi upernaakkut ataatsimiinnissaannut innarluutilinnik suliaqartut ilinniarnerannut piginnaasanillu qaffanneqarnissaannik periusissiamik iliuusissatullu pilersaarummik saqqummiussissapput.

Naalakkersuisut tamassuma saniatigut Kalaallit Nunatta innarluutilinnut siunissami ilinniagaqarnissamut inuussutissarsiuteqarnissamullu periarfissat neqeroorutaasinnaasut suunissaannik pilersaarusiornissaq kissaatigaat.

Aallaavigineqartoq tassaavoq kommunit aamma Namminersorlutik Oqartussat akisussaaffeqarmata, kinaluunniit innarluutilik pitsaanerpaamik pikkorinneruffeqalernissaminut periarfissaqarnissaa.

Innarluuteqartut assigiinngiiaarput. Assigiinngitsorpassuarnik pisariaqartitsisarput ilinniagaqarnissamillu kissaateqartarlutik. Taamaammat innarluutilinnut taamaallaat tunngatitanik ilinniarfinnik isumalluutit eqqarsaatigalugit pilersitsisoqarsinnaanngitsoq Naalakkersuisut tusagassiuutinut nalunaaruteqarlutik erseqqissapput.  

Ilinniarneq ilinniarfinni pioreersuni ingerlanneqassaaq ingerlanneqarsinnaallunilu, taakkunani ilinniartut inaannik ilinniartitsinermilu ininik nutaanik sanaartornernut atatillugu innuttaasut innarluutillit ilinniarfitsinni tikilluaqquneqarnissaannut pisariaqartunik innarluuteqartut ullutsinnut naleqquttunik iserfissaqarnissaat ingerlavissaqarnissaallu Naalakkersuisut qulakkeerpaat.

Innuttaasut amerlassusaat isorartuumilu inoqarfeqarnera pissutigalugit neqeroorutit sullissinerillu sumiiffinni tamani neqeroorutigineqarsinnaanngillat, Naalakkersuisut erseqqissaapput.

Ilanngullugu tikkuarneqarpoq  innarluuteqartut  sumiiffimmiit sumiiffimmut nooriartaarsinnaaneq pisariaqarsinnaammata illoqarfinni allani ilinniagaqarniarlutik angerlarsimaffimmiit aallartariaqartarnerattut tamanna illoqarfimmit imaluunniit nunaqarfimmit najugarisamit allamut nuunnissamik kinguneqarsinnaalluni.
Soorlu inuusuttut allat angerlarsimaffitsik qimallugu ilinniariartortartut,  Naalakkersuisut ilaatigut taama allapput.