Naalakkersuisut ingerlatseqatigiiffinni pisortat pigisaanni qullersanik taarsersuinertik ingerlatiinnarpaat
Tassanili siulersuisunik taarsersuineq Royal Arctic Linemituulli annertutiginngilaq. Siulersuisuni siulittaasup tulliatut ivertinneqarsimasoq, Line Frederiksen, ukiuni pingasuni siulersuisuni sulereerluni siulersuisut qimappai, peqatigisaanillu aamma Aaja Chemnitz Larsen, Meeqqat Oqaaseqartuattut ilisarisimaneqartoq, Tele Post Greenlandip siulersuisuini ukioq ataasiinnaq ilaasortaareerluni ilaasortaajunnaarpoq, naak ukiuni marlunni ilaasortaasussatut toqqagaasimagaluarluni.
Line Frederiksen aamma Aaja Chemnitz Larsen kommunaldirekør Paneeraq Olsenimit Sisimiuneersumit aamma Greenland Sagalandsimi takornariartitsinermut pisortamit Edda Lyberthimit Qaqortumeersumit taarserneqarput.
Naalakkersuisut siulittaasuat Aleqa Hammond, Siumumeersoq, siulersuisunik taarsersuineq pillugu suli oqaaseqartissinnaasimanngilarput. Taanna ataatsimeersuarnermi peqataanngilaq. ilanngulluguli oqaluttuarisinnaavarput siulersuisut siulittaasuat Agner M. Mark aamma siulersuisunut ilaasortaq Søren Voigt toqqagaaqqimmata.
TELE-POST Greenland 94,3 millionit koruuninik, akileraannginnermi, sinneqartooruteqarpoq. siornamut naleqqiullugu appasinnerulaaraluartoq angusaq naammagisimaarneqarpoq piginnittullu - tassalu Namminersorlutik Oqartussat - 47 millionit koruuninik iluanaarutissarsitinneqarput.