Naalakkersuisut ingerlatseqatigiiffiit misissueqqissaarfiginiarpaat

Suliffeqarfiit Namminersorlutik Oqartussanit pigineqartut namminersortunngorsarneqarnissaat siunertaralugu nassuiaasoqarnissaanik Inatsisartuni aalajangiiffigisassatut siunnersuummik Atassut misiliigaluarpoq, siunnersuuteqarnissaminulli kingusinaalaarluni.
Allattoq Mads Lynge
novembarip 04-at 2009 06:01

Ingerlatseqatigiiffiit pisortanit pigineqartut tamaasa misissuiffigeqqissaarneqarnissaat Naalakkersuisut aallartereerpaat.

Misissueqqissaarneq ingerlatsiveqarfinnut ataasiakkaanut siunissami piginnittuunissamik inassuteqaatinik assigiinngitsunik kinguneqassaaq.

Naalakkersuisut siulittaasuata Kuupik Kleistip oqarnera naapertorlugu naliliinermi ingerlatseqatigiffiit inuiaqatigiinnut suliassiissutigineqartunik suliallit ingerlatseqatigiiffiillu niuernikkut piumasaqaatit malillugit ingerlasut immikkoortinneqassapput.

Kuupik Kleistip aammattaaq namminersorneq pillugu isumalioqatigiissitap isumaliutissiissutaa 2003-meersoq innersuuppaa.

Ingerlatseqatigiiffiit pisortanit pigineqartut ikiliartortinneqassasut qitiusumillu pisinnaasaqarfitik pingaartinnerullugit ingerlatissagaat siunertarineqarluni isumaliutissiissummi inassutigineqarpoq.

- Ingerlatseqatigiiffiit ullumikkut paasiuminaappallaarput aamma angissusersuarmikkut nunatta aningaasarsiorneranut tamarmiusumut annertuumik ajutoortitseratarsinnaallutik, Kuupik Kleist oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq