Naalakkersuisut ineriartortitserusupput
Quebecimi nunap immikkoortuani naalakkersuisut ukiuni arlalinni annertuumik pilersaarusiornermik suliaqarput, Quebecip avannaata ineriartortinnissaanut pilersaarummik.
Nunap ilaani tamaani Frankrigitut angitigingajattumi Nunavik ippoq, naak naggueqatigiit Inuit 10.000-it missaannaanniittut tamaani najugaqaraluartut. Nunarujussuup tamatuma sinnerani ilaatigut naggueqatigiit Innut, Kri-t, Montagnais-it kiisalu indiaanerit Naskapi-t najugaqarput. Sapaatip akunnerani uani Quebecip ministeriunera Jean Charest avannaanut pilersaarut oqaluuseriniarlugu Inunnik 200-nik indiaanerillu pisortaannik ataatsimeeqateqarpoq.
Avannaanut pilersaarummi pineqarput nukissiuutitigut ineriartortitsinissaq, aatsitassarsiorfiit nutaat, nukissiuuteqarfissanik pilersaarutit annertuut kiisalu nunami tamaani tamarmi pinngortitamik mianerinnilluni takornariartitsinermik ilungersuussineq.
Pilersaarut ataqatigiissaarluagaallunilu pitsaasuussaaq aningaasarsiornerup patajaatsumik ineriartortinnissaanik kinguneqartussaq, Quebecimi naalakkersuisut taama oqarput. Pilersaarut aamma inuiaqatigiinnut pitsaasortaqassaaq, assersuutigalugu Nunavimmi illut 1.000-it missaanniittut amigaatigineqartut 3 milliardit kouunit missaanni akeqartut naliliisoqarpoq, taakkualu pilersaarummi ilanngunneqassallutik.
Quebecimi naalakkersuisut aamma nalunaarutigaat ukiuni tullerni marlunni 550 millioner koruunit missaanni atorneqassasut Nunavimmi nunaqarfinni 13-ini timmisartut mittarfiisa iluarsaannissaannut.
Makivik Corporationimi præsidenti Pita Aatami Nunaviup aningaasaqarnikkut aqutsisua Quebecimi ministeriunermik ataatsimeeqateqareerluni oqarpoq, avannaanut pilersaarut aammalu naggueqatigiit Inuit pilersaarusiornermi ilanngunneqarsimanerat nuannaarutigalugu. Quebecimili indiaanerit naammaginnippianngillat.
