Naalakkersuisut inatsisit unioqqutillugit immikkut akuersipput
Immikkut ittumik akuersissuteqarnissaq Nukissiorfiup, Namminersorlutik Oqartussat inatsisilerinermut allaffiata nunattalu nakorsaanerata Flemming Stenzip mianersoqqussutigigaluarpaat.
Immikkut akuersisoqarnera Siumumit Atassummiillu apeqquserneqarpoq. Anthon Frederiksenillu inissinneqarnissaa Siumup siulittaasuata Aleqa Hammondip piumasaraa:
- Inuiaqatigiit imeqarniarnerannut ulorianartorsiortitsisinnaasumik aalajangersaasussaanngilaq aamma avatangiisit illersorlugit suliniuteqartussaavoq. Sillimaniarneq salliutinneqartussaavoq. Isumaqarpunga inatsisit pioreersut suli allanngortinneqanngitsut qaangiataaginnarlugit Anthon Frederiksenip nammineq ilisimasaqarnerusutut inissinnera ulorianartorujussuusoq. Taamaammat inissinneqartariaqarpoq, Siumup siulittaasua Aleqa Hammond oqarpoq.
Atassutip siulittaasuanit Gerhardt Petersenimit taanna taperserneqarpoq:
- Immikkut ittumik akuersissuteqarneq pissaanermik atornerluineruvoq, Gerhardt Petersen oqarpoq, nangillunilu:
- Nakorsaanerup mianersoqqusinera eqqarsaatigissagaanni, naalakkersuisut immikkut ittumik akuersinerat uagut tungitsinninngaanniit akuersaarneqarsinnaanngilaq, Atassutip siulittaasua Gerhardt Petersen oqarpoq.
Naalakkersuisut siulittaasuat Kuupik Kleist oqarpoq naalakkersuisut tamarmiullutik immikkut ittumik akuersissummik tunniussisuusut, naalakkersuisunullu ilaasortat ataasiakkaat nammineq aalajangiinngitsut. Immikkut ittumik akuersissummik tunniussineq pillugu Kuupik Kleist ima oqarpoq:
- Qanoq iliortoqassanersoq aammalu qanoq saliisoqassanersoq akuersissummi allassimatippagut. Illiniliuutit aamma kivisinnaanissaat ilaatigut oqaatigineqarpoq. Tamanna ilumuunngilaq, illiniliuutimmi tasikkoorsinnaanngillat nunamiiginnartussaallutik. Taamaattumik pissutsit assigiinngitsut oqimaaluteerlugit inuillu ulorianartorsiortikkunnaarusullugit taamatut immikkut akuersissummik tunniussivugut, Naalakkersuisut siulittaasuat Kuupik Kleist oqarpoq.
