Naalakkersuisut inatsisiliassatut aallukkumasatik saqqummiuppaat
Tamatumunnga aalisartut kattuffii qanimut peqataatinneqassasut, naalakkersuisut siulittaasuat neriorsuivoq.
Naalakkersuisut inatsisilionikkut ukiumi nutaami naammassiniarusutaminnik ukiut aallartinneri tamaasa saqqumiisarnialerput.
- Pilersaarusiorsinnaaneq suliassallu siusinaartumik aaqqissuusinnaanissaat eqqarsaatigalugut, Naalakkersuisut ukiup sinneranut inatsisiliassatut inatsisartunullu saqqummiussassatut pilersaarutaat ukiup aallartinnerani saqqummiuttassallugit pingaartipparput, Kuupik Kleist oqarpoq.
Aamma Innuttaasunit qanittukkut oqalligisineqartoq nutaamik inatsisiliuunneqassaaq, tassalu kulturikkut kingornussassat eqqissisimatinneqarnissaat illersorneqarnissaallu pillugit inatsisip nutarterneqarnissaa.
Tamatumanilu suna pingaartinneqarnerussanersoq pissanganassaaq; Inuussutissarsiornikkut pilersaaruterujussuit, soorlu aluminiumut tunngasut, imaluunniit kinguaanut pigititassat, soorlu Tasersiap allanngutsaalisariaqarnera.
Aamma allanik inatsisiliornissaq pilersaarutaavoq. Assersuutigalugu pujortartarneq pillugu inatisiornissaq isiginnaartitsisoqarnerlu pillugu nutaamik inatsisiliortoqassaaq.