Naalakkersuisut inatsisiliartik maleruanngilaat

Kalaallit Nunaanni Naalakkersuisut angutaannavinnik ilaasortaqarput tamannalu Naligiissitaanissamut Siunnersuisoqatigiinni oqallisigisassaqqippoq, siulittaasoq oqarpoq.

Naligiissitaanissamut Siunnersuisoqatigiinni ilaasortat naligiinngillat. Maannakkut angutit marluk kisimik ilaasortaapput, tassalu siulittaasoq Poul Hansen KANUKOKA-lu sinnerlugu ilaasortaatitaq Knud II Kristiansen.

Siunnersuisoqatigiit arfinilinnik ilaasortaqartussaagaluarput , ilaasortallu sinneri sisamat naalakkersuisunit toqqarneqarnissaat utaqqineqarpoq.

Siunnersuisoqatigiit kingullermik ataatsimiipput apriilip qaammataani, ukiorlu naatinnagu ataatsimiinnerit kingullersaat ingerlanniarneqartoq, Poul Hansen oqarpoq.

Siunnersuisoqatigiit tamakkiisumik ilaasortaqanngikkaluartut, suliassiissutigineqartut ingerlanneqarput. Arnat angutillu naligiinnerunissaat pillugit paasissutissat quppersaganngorlugit naqiterneqarput sinerissamullu nassiussuunneqarlutik.

Siunnersuisoqatigiit sinerissami illoqarfinni nunaqarfinnilu sinniisussaannik “ambassadør”-inik pissarsiorneq ingerlanneqarpoq.

Siunnersuisoqatigiit ilaasortassaasa sinnerinik toqqaasoqarnissaa pillugu Ilaqutariinnermut naalakkersuisoq Arkalo Abelsen ullut qulit matuma siornagulli saaffigineqarpoq, akissuteqarnissaalu utaqqineqarluni siulittaasoq Poul Hansen oqarpoq.