Naalakkersuisut immikkut ittumik ataatsimiipput

Naalakkersuisut ataannassanersut minutsini makkunanerpiaq aalajangerneqariaannaavoq.

Aalisarnermut Piniarnermullu Naalakkersuisup, Finn Karlsenip, ammeriviup Great Greenlandip pisortaanik suliunnaarsinneqarnissaanik ippassaq oqarnera, Naalakkersuisut immikkut ataatsimiisinneqarnissaannik Inuit Ataqatigiit piumasaqarneranik kinguneqarpoq.

Politiinut unnerluutigineqarnermi kingorna Finn Karlsen Naalakkersuisunut ilaasortaaginnarsinnaanersoq Josef Motzfeldtip apeqquserpaa. Josef Motzfeldt aamma isumaqarpoq, naalakkersuisooqatigiinneq pappialakkuinnaq isumaqatigiissutaasimappat, naalakkersuisooqatigiinnerup ataqatigiissinniarnera ajornakusoorsinnaasoq. Aningaasaqarnermut Nunanullu allanut tunngassuteqartunut Naalakkersuisoq Josef Motzfeldt tusagassiutitigut ima allappoq:

- Siullermik: Aalisarnermut aamma Piniarnermut naalakkersuisup Finn Karlsenip Inatsisartut oqaluttarfiannit naalakkersuisut aalajangersimanerarpai, Great Greenland-ip misissuiffigineqarnerata nalaani ingerlatsiviup pisortaa Michael Nielsen suliunnaarsinneqarallassasoq, tamanna eqqunngilaq.

Aappassaanik: Misissuisoqarnissaa aallarterianngitsoq naalakkersuisut eqqartuussisuusaarnissaat akuerineqarsinnaanngilaq.

Pingajussaanik: Naalakkersuisunut ilaasortamik politinut tunniussineq isiginngitsuusaarneqarsinnaanngilaq, Josef Motzfeldt allappoq.