Naalakkersuisut iliuuseqarnissaat Siumumit ujartorneqarpoq
- Kommunit kattussuunnerisa kingunerisaanik aningaasartuutit kommuninit nammanneqartut arlaqarput, taamaattumik kommuninut ataatsimoortumik tapiissutit amerleqqinneqartariaqarput, Karl Lyberth Siumut sinnerlugu politikkikkut oqaaseqartartoq isumaqarpoq.
- Kommuninut ataatsimoortumik tapiissutit ikilisarnagit amerleqqittariaqarput. Taamatut iliortoqanngippat kommunit aningaasatigut ajutoorujussuassapput, Karl Lyberth Qanoruumut oqarpoq.
Naalakkersuisut inatsisartunilu ilaasortat amerlanerussuteqartut ingerlatsinerat akuerineqarsinnaanngilluinnartoq, Karl Lyberth isumaqarpoq.
- Kommunit aningaasaqarnikkut ajutoornissaat ajoraluartumik piviusunngulerpoq, tamannalu akuerineqarsinnaanngilaq, Karl Lyberth oqarpoq.
Kommunit aningaasaqarnikkut aqutsinerannut akuliunnissamik naalakkersuisut pilersaaruteqanngillat.
- Kommunit kommunalbestyrelsillu namminneerlutik aqutsinissaminnik kiffaanngissuseqarput, tamanna naalakkersuisunit akuleruffigineqarsinnaanngilaq, Anthon Frederiksen Qanoruumut oqarpoq.
Tassa akulerunnianngilatit?
- Kommunini aningaasaqarnikkut aqutsineq naalakkersuisut akuleruffigisussaanngilaat, tassani kommunit kisimik oqartussaapput, Nunamut namminermi pissutsinut naalakkersuisoq oqarpoq.