Naalakkersuisut ilassinninnermut aningaasartuuteqangaatsiarput
Naalakkersuisut allattoqarfianni allattaavimmi Radioavisip pissarsiarisimasaani takuneqarsinnaavoq, naalakkersuisuni ilaasortat ilassinninnerminni aningaasarpassuit atortaraat. Naalakkersuisut siorna katillugit 1.250.000 koruunit atorsimavaat.
Avatangiisinut, Ineqarnermut Attaveqarnermullu Naalakkersuisoq Jens Napaattooq tamanit atuinerpaasimavoq, 410.000 koruunit sinnerlugit imaluunniit allatut oqaatigalugu naalakkersuisut tamarmiusut ilassinnerminni atugaasa pingajorarterutaattut amerlatigisut atorsimavai.
Jens Napaattuup taamaalilluni agguaqatigiissillugu ullormut 1.400 koruunit missaanniittut pisunut immikkut ittunut taasanut atortarsimavai. Napaattuup pisortaqarfiata erseqqissaatigaa, aningaasat taama amerlatigisut atorneqarnissaannut peqqutissaqanngikkaluartoq, naalakkersuisup angalangaatsiartarnera eqqaassanngikkaanni.
Naalakkersuisuni atuinerpaap tulleraa Kulturimut Ilinniartitaanermullu Naalakkersuisoq Henriette Rasmussen. Henriette Rasmussenip siorna 180.000 koruunit missaanni ilassinninnermini atorsimavai.
Jens Napaattuup ilassinninnermini aningaasartuutaasa uppernarsaatitaat Radioaviisip Nuuk TV suleqatigalugu misissorsimavai, tassunga tunngasut ullup qeqqanut itinerusumik sammissavavut.
