Naalakkersuisut IA-lu attaveqaqatigiinniarnikkut ajornartorsiuteqartut
Siumup qineqqusaarnermi siammasissumik suleqatigiinnissamut assammik isaassisimanera erseqqissaatigaa. Aamma partiit siulittaasui taakku marluk suleqatigiinnissaq oqaloqatigiissutigalugu kaffisoqatigiissimanerarpai.
Partiilli taakku marluk tamatuma kingorna ataatsimeeqatigeeqqissimanngillat.
- Isumaqatigiinniutissaqarsimanngilaq. Naalakkersuisullu taamatut isummereersimallutik qinigaaffik manna aallartissappassuk ernumassutissaqarlunga misigisimavunga, Sara Olsvig aviisimut Informationimut oqarpoq.
Atuinermut akiliuteqartitsinissamik piumasaqaateqartoqarnera tupaallaatigigaa
Pituffimmi sakkutooqarfimmut tunngatillugu atuinermut akiliuteqartoqarnissaanik Kalaallit Nunaata piumasaqaateqarniarneranik Kim Kielsenip Danmarkimi tusagassiortunik katersortitsinermi oqaaseqarnera IA-p siulittaasuata tupaallaatiginerpaavaa. Taamatut piumasaqaateqarniarneq IA-p taperseraluarlugu, Olsvig isumaqarpoq Naalakkersuisut taamatut nalunaaruteqannginnerminni tamatuma Inatsisartuni oqaluuserineqarnissaa isumagisimasariaqaraluaraat.
Olsvigip taamatut isornartorsiuinera pillugu Informationip Kim Kielsen oqaaseqartinngilaa. Naalakkersuisulli siulittaasuat aviisimut tassunga siornatigut oqaatigisimavaa IA-p siulittaasua suleqatigiuminaappallaartoq - oqarneratullu - IA-p isummani malittuinnaq allanngortimmagu.
