Naalakkersuisut: Great Greenland isumalluarnarsivoq
Naalakkersuisut upperaat EU-mut amminik eqqusseqqusiunnaarsimaneq illuatungaanut saatinneqarumaartoq. Aammalu pisisussanik nutaanik nassaarniartuaannarnissaq pisariaqarsorinarmat aningaasanik aappaagu ingerlatsinermut atugassanik tapiissuteqarput.
- Great Greenlandip matunnginnissaa siunertaralugu 12 million koruuninik aningaasaleeqqippugut, Aalisarnermut Naalakkersuisoq Ane Hansen oqarpoq.
Great Greenlandimit neriuutigineqarpoq aningaasassanut inatsisissamut siunnersuutigineqartut akuerineqarumaartut.
- Neriuutigilluinnarparput akuerineqarumaartut, tapersersorneqarnerput pingaaruteqartorujussuuvoq. Bankimmi aamma takusinnaalerpaat piginnittunit tapersersorneqartugut, Henrik Estrup, Great Greenlandip pisortaa, oqarpoq nangillunilu:
- Ukiuni kingullerni pingasuni isertitagut annertuumik appariartorsimapput. Maannalu suliffeqarfimmi sipaarniarneq ingerlatereerlutigu ajornartorsiornitsinnit ingerlariaqqissinnaalertutut inissippugut. Taamaakkaluartorli imminut akilersinnaasumik ingerlalernissarput suli ungasippoq, Henrik Estrup oqarpoq.
Great Greenlandip ukiumut kaaviiartittagai 2006-imi 69 million koruuniniit 2009-mi 9 million koruuninut appariarput. Pisortarlu naliliivoq kaaviiaartitat amerlinerisigut suliffeqarfik siumut aallarteqqinneqarsinnaasoq.
Naalakkersuisut siulittaasua aamma piniarnermut naalakkersuisoq Ane Hansen suleqatigiillutik EU-mi nunat piseqqittalernissaat anguniarpaat:
- Ilisimatuussutsikkut paasisat oqariartuutigineqartartullu EU-mi pingaartinneqarunnaarsimasut tunngavilersuutigaavut. Piujuaannarnissamik piniarnerput aamma tunngavilersuutitut oqariartuutigaarput, tamannalu aqqutissaavoq EU-mi ammit tunisaaqqilernissaat angussagutsigu, Ane Hansen oqarpoq.
EU-mi nunat saniatigut Kina isumalluutaavoq.
- Great Greenlandimiit niuerfissat allat ujartorneqarput. Niuerfiusinnaasullu isumalluarnartut ilagaat Kina. Tassani atisaliornermik suliffeqarfiit qaffassarneqarnerat tunngavigaarput, Kina isumalluarnartuuvoq niuerfigissallugu, Ane Hansen oqarpoq.
Aatsaat siullermiinngilaq Great Greenland Naalakkersuisunit ingerlatsinermut tapiiffigineqarnera.
- Piffissaq ungasinnerusoq isigalugu 12 million koruunit aningaasaliissutaapput. Ukiuni aggersuni Great Greenlandip niuernera iluatsinngitsuussappat tamanna aamma sillimaffigaarput, Ane Hansen naggasiivoq.