Naalakkersuisut eqqartuussivilersorniarneqarput

Meeqqat pillugit FN-ip aalajangersagai, namminersornerullutik oqartussat unioqqutikkai, ukioq kingulleq PIP Nuuk oqarpoq, siorasaarippullu eqqartuussivilersuussissallutik. Namminersornerullutik oqartussat iliuuseqarniarlutik neriorsuuteqarmata, PIP-p siorasaarinini unitsikkallarpai. Ukioq ataaseq susoqanngiinnarmat, eqqartuussivilersuussinissaq aallartinneqaqqilersoq, Perorsaasut ilinniarsimasut peqatigiiffiani siulittaasoq Naasunnguaq Bisgaard oqarpoq.

- Meeqqat inuusuttuaqqallu sumiginnakkat pillugit susoqanngisaannarmat, taava neriorsoramitigut ukiup ataatsip ingerlanerani iliuuseqassallutik, tassa ulloq unnuarlu paaqqinniffinnik sanasoqassasoq, aammalu meeqqat inuussuttuaqqallu sumiginnakkat pillugit iluamik suliaqartoqassasoq. Ukioq ataaseq ingerlareermat, PIP-minngaanniit eqqartuussivissuarmut tunniussinialerpugut. Naasunnguaq Bisgaard oqarpoq.

Namminersornerullutik oqartussat suliniutaat marluk ingerlapput. Sisimiuni ulloq unnuarlu paaqqinniffissaq naammassineqalerpoq, aammalu utaqqisut pillugit qitiusumik aqutsisoqarfimmik pilersitsinialerneq naammassilerluni, suliniutit taakkua naammannginnersut raatiuaviisi aperimmat, Naasunnguaq Bisgaard oqarpoq, suliniutit naammanngitsut.

- Suliniutit ajunngillat nuannaarutigeqaagullu. Kisianni meeqqat inuusuttuaqqallu sumiginnakkat taamak amerlatigisut, taakkualu pillugit suli iluamik suliniuteqartoqalinngilaq. Eqqartuinerusariaqarpugut, meeqqammi siunissaraagut. Meeqqat inuusuttuaqqallu siulliullugit, timmisartoqarfissat kingulliusuuppata iluassagaluarpoq Naasunnguaq Bisgaard oqarpoq.

Aamma Nuummi PIP-p siulittaasua Nasunnguaq Bisgaard oqarpoq suliamut naleqqunnerusumik akissarsiaqartinneqarnissaq pisariaqartoq.