Naalakkersuisut eqqaavinni ikuallaasinnaalersitsisut

Eqqagassat eqqaavissuarmi ikumatitassarujussuanngorlugit ikuallanneqartartut.

Inerteqqutaasimagaluarpoq, naalakkersuisulli igitassanik eqqaasarnermut piumasaqaatinik immikkut akuersissuteqarsinnaanissaq pillugu nalunaarut akuersissutigeqqammerpaat, nalunaarullu pillugu tusarniaasoqarnani. Tassa kommunit, innuttaasut susassaqartullu allat tusarniaavigineqqaarsimanngillat naak taamaattoqartussaagaluartoq.

Nalunaarutilli tusarniaassutigeqqaarnagu akuersissutigineqapallannissaa pisariaqarsimasoq, Pinngortitamut Avatangiisinullu Naalakkersuisoqarfiup pisortaata, Mette Skarregaard Pedersenip oqaatigaa.

- Nakkutigineqanngitsumik ammaannartumik ikuallaasoqartarnera unitsinniarlugu nalunaarut tusarniaassutigineqanngilaq, pisortaq oqarpoq.

Kommunimut erngertumik peqqussuteqartut

Januaarip ulluisa 22-anni pisoq pissutigalugu naalakkersuisoqarfik suligasuartariaqarsimavoq.

Naalakkersuisut Upernavimmi nakkutigineqarsinnaanngitsumik ikuallaasoqartoq ilisimatinneqarput, taamaalimmallu Avannaata Kommunia ikuallaaneq ingerlaannartumik unitseqqullugu peqqussuteqarfigaat. Nalunaarullu nutaaq februaarip ulluisa tallimanni atuutilereerluni.

AAMMA ATUARUK Uummannami eqqaavissuaq ulorianartumik pujuliortoq

Eqqagassaleriffiup pilersinneqaqqammersup, Esani A/S-ip pisortaata, Frank Rasmussenip ammaannartumik ikuallaasarnerup killilersimaarneqarnissaa pillugu nunarput tamakkerlugu ikuallaavinnik pilersitsiortornissamik sulissuteqarpoq.

- Eqqakkanik ammaannartumik ikuallaasarneq sapinngisamik pinngitsoortinniarneqartariaqarpoq, aatsaat pisariaqavissappat ikuallaasoqarsinnaasariaqarluni, pisortaq oqarpoq.

Eqqakkanilli passussisarnerup pitsannngorsaavigineqarnissaa taassuma piffissami sivisuumi suliarisimavaa, nalunaarullu nutaaq ajornartorsiutit ilaannut aaqqiigallarsinnaasoraa.

- Ammaannartumik ikuallaasarneq ukiualunnguit matuma siornatigut inerteqqutigineqalermat, eqqakkanik passussisarneq allatigut aaqqiivigineqanngilaq. Tamanna ilaatigut pissutaalluni illoqarfinni nunaqarfinnilu ikuallaasoqartarnera takornartaanngilaq, Frank Rasmussen oqarpoq.

Ikuallaaneq nakkutigineqassasoq

Ammaannartumik ikuallaasoqarnissamut immikkut akuersissuteqarsinnaaneq, nalunaarutip nutaap ammaassiffigaa, nakkutigilluakkamilli ikuallaasoqartassalluni. Naalakkersuisoqarfiup pisortaata, Mette Skarregaard Pedersenip erseqqissaatigaa.

- Ikuallaanermi malittarisassaqassaaq. Eqqakkat immikkoortiterneqarsimassapput, assersutigalugu avatangiisinut ulorianartunik ikuallaasoqaqqusaanani.

AAMMA ATUARUK Eqqakkanik ikuallaavittaassat 400 millionit koruunit pallillugit akeqassasut

- Eqqakkallu qanoq annertutigisut ataatsikkut ikuallanneqarsinnaanerinut killiliisoqassalluni, soorlu aamma sanaartukkanut imeqarfiillu killeqarfiinut ungasissusissat minnerpaaffiinut tunngasut ilaatinneqartut, naalakkersuisoqarfimmi pisortaq, Mette Skarregaard Pedersen oqarpoq.

Nalunaarut atuutilersinneqalerneranit Avannaata Kommunia ikuallaasinnaanissamut immikkut akuersissummik qinnuteqarpoq.