Naalakkersuisut digitalitigut ineriartortitsineq malittariniarpaat

Sulianik qarasaasiakkoortitsinerulernissamut periusissaq nutaaq Naalakkersuisut maanna atuutsilersippaat, tamatumuunakkut nuna ataatsimoortinneqarnerulissaaq, pisortat sullissinerat pistaanerulersinneqassalluni, tamatumalu peqatigisaanik innuttaasut suliffeqarfiillu qarasaasiakkut periarfissarissaarnerulissallutik.

Periusissami nutaami "Sulianik qarasaasiakkoortitsinerulernermik" taaguuteqartumi, atugarissaarneq aamma inooqatigiinnikkut ineriartorneq nukittorsarneqassasut, Naalakkersuisuni ilaasortap Vittus Qujaukitsup oqaatigaa.

- Suliniutini periaasissatut anguniakkat aamma aallartisakkat tunngavigaat, naalakkersuinikkut kissaat naligiinnissamik anguniagaqarnermik tunngavilik, innuttaasut sumiluunniit najugaqarnerat apeqqutaatinnagu, oqaaseqaammini taama erseqqissaavoq.

Qarasaasianik atuinerulernerput, soorlu oqarasuaatinik angallattanik internetimillu ulluinnarni atuinerulernerput periaasissami aallaavigineqarput.

Periaasissami nutaami suliniutit 35-t, ukiuni tulliuttuni pingasuni - tassa ukiormannamit 2017-ip tungaanut - aallarnisarneqassapput.

Siullertut pingaarnertullu nuna tamakkerlugu internetersinnaaneq pitsaanerullunilu akikinnerulissaaq. Meeqqat atuarfiannut ilinniutit qarasaasiakkoortut, faginut pikkorinnerulernermik kinguneqartussat pingaartinneqassapput.

Periusissiami nuna tamakkerlugu peqqissutsimut aningaasartuutinik ikilisaasussanik aallarnisaasoqassaaq. Pappiaqqanik immersugassanik atuineq minnerulersinneqassaaq, innuttaasut taamaalillutik oqartussanut toqqaannarnerusumik Sullissivik atorlugu attaveqarsinnaassallutik.

Naalakkersuisut qarasaasiarsornerulernissamut periusissaanniittumi suliniutit 35-t ilaannaat taamaalilluta taalaarpavut.