Naalakkersuisut avaleraasartuut misissuiffigineqarnerunissaat siunniukkaat
Taamaattumik Naalakkersuisut avaleraasartuut angissusaannut siaruarfigisaannullu Tunumi kujataanilu biologinut misissuititsinissamut 6,2 millionit koruuninik aningaasanut inatsisissami 2015-imoortumut immikkoortitsipput.
Naalakkersuisut tusagassiorfinnut nalunaaruteqarlutik taama allaaserisaqarput.
Atlantikup avannaani tamarmi avaleraasartoorniartoqarpoq, ukiumullu 1 millionit tonsit pallillugit aalisarneqartarlutik.
Kalaallit Nunaat avaleraasartoorniartarnermi naalagaaffittut sinerialittut nutaatut biologit misissuineri aallaavigalugut naliliisoqarneratigut naatsorsuisoqarneratigullu pisassaminik piumasaqartussaavoq.
AAMMA ATUARUK Kruse: Avaleraasartoorniarnermi nunaqavissut salliutinneqassapput
- Pisuussutinik imartatsinniittunik atuilluarnissarput inuiaqatigiinni pisariaqarteqaarput. 2015-imi avaleraasartoorniarnissaq malinnaaffigissallugu qilanaaraara, avaleraasartooqassutsillu misissuiffigineranni angusarineqartut qilanaaralugit. Ukioq manna avaleraasartooqassutsip misissuiffiginerani uppernarsaatissat pissarsiarineqartussat pingaaruteqartorujussuupput, Aalisarnermut Piniarnermut Nunalerinermullu Naalakkersuisoq Karl Kristian Kruse oqarpoq.