Naalakkersuisut ataannassapput
Naalakkersuisut ataannassapput. Inatsisartut ullumi ataatsimiinnerat aallartiinnartoq Demokraatit piumasaraat naalakkersuisooqatigiit eqqissillutik ingerlaqqissanersut inatsisartunut sulisitsisuusunut erseqqissumik paasissutissuutigineqartariaqartoq.
- Radioavisimi ulloqeqqanut oqaaserineqartut paatsuunganarput. Taamaattumik Demokraatinit Naalakkersuisoq Finn Karlsen matumuuna qinnuigaarput manna oqaluttarfik atorlugu Great Greenlandip ingerlatsisuinut, naalakkersuisunut kukkunersiuisunullu utoqqatseqqullugu. Taamaanngippat Naalakkersuisut siulittaasuat Hans Enoksen qinnuigissavarput manna oqaluttarfik atorlugu paasissutissiissutigeqqullugu, sooq Finn Karlsen utoqqatseqqujunnaarneraa.
Inatsisartut ataatsimiinnerat ullormut oqaluuserisassat naapertorlugit ingerlatinneqaleraluartoq Naalakkersuisut siulittaasuata Hans Enoksenip oqaluttarfimmukarluni naalakkersuisut erngerlutik ataatsimeeqatigiinnissaat nalunaarutigaa. Inatsisartullu ataatsimiinnerat unitsikkallarneqarpoq.
Pingasut missarileraa tutsiuppoq naalakkersuisut ataatsimiikkunnaartut immikkullu tunuliaquttatik ataatsimeeqatiginialeraat.
Inatsisartut ataatsimiinnerat nalunaaqutaq sisamanut nanginneqarpoq, aallartissutigineqarporlu Finn Karlsenip utoqqatsissutaa, Naalakkersuisut siulittaasuannut Hans Enoksenimit atuarneqartoq.
