Naalakkersuisut ataannarsinnaasorinngilaat

Naalakkersuisooqatigiit ataannarsinnaanerat illuatungiliuttut apeqquserpaat. Inatsisartunik tatiginninnginneq ippassaq oqaluuserineqarmat siunissami inatsisartuni suleqatigiinnerup ajornakusoorluinnalernissaa illuatungiliuttunit taaneqaqattaarpoq.

-Iliuusissatuaararput illuatungiliuttutut sakkortuumik politikkeqarnissaq, Atassut Kattusseqatigiillu peqatigalugit, Demokraatit siulittaasuat Per Berthelsen oqarpoq.

Aalisarneq pillugu nassuiaatip kukkuneqarnera illuatungiliuttunit uparuarneqarpoq. Nassuiaammi siullermi Naalakkersuisut Royal Greenland-imut namminersortunngorsaanermi suliat nanginneqarnissaannik inassuteqassasut allassimavoq, saqqummersumili kingullermi taakku oqaaseqatigiit peerneqarsimapput.

Illuatungiliuttut isumaqarput unioqqutitsisoqartoq.

Atassutip siulittaasua Augusta Salling oqarpoq Naalakkersuisunut tatiginnikkunnaavillutik.

-Nunatsinni politikkimut ajoqutaavoq naalakkersuisut paatsiveerussaarinerat inatsisartuni amerlanerussuteqartut akuerimmassuk, Augusta Saling oqarpoq.

Naalakkersuisut siulittaasuata Hans Enoksen-ip nassuerutigaa kukkusoqarsimasoq, nutserinerliortoqarsimasoq unnerlugu.

- Kukkusumik nassuiaateqarnissaq siunertaasimanngisaannarpoq, nutsikkallu kukkuneqarnerat soorunami ilungersunaqaaq, naalakkersuisut siulittaasuat Hans Enoksen oqarpoq.