Naalakkersuisut assoralisimaarput

Siumut itigartitsilluinnarpoq. Atassut akuersaarnianngilaq. Inuit Ataqatigiiit qularnartoqartitsipput.

- Sooq ilaat akitsuutinik akiliissannginersut paaserusupparput, kingunissaannillu naatsorsuisitserusulluta, Naaja Nathanielsen oqarpoq.

Avatangiisinut akitsuummik nutaamik atulersitsinissamut, illoqarfinni nunaqarfinnilu erngup nukinganik innaallagissiorfeqanngitsuni innaallagissap kiassarnerullu akisunerulernissaanik kinguneqarnissaa ilimanartumik, Naalakkersuisut siunnersutaannut Demokratit aamma qularnartoqartitsipput.

Ingammik umiarsuit timmisartullu aalajangersimasut avatangiisinut akitsuuummit pineqannginnissaat partiini naalakkersuisuuteqartuni akerlerineqarpoq.

- Avatangiisinut akitsuutinik innuttaasunut ataatsimoornerusumik tunnissaat kissaatigaarput. Imaanngitsoq innutaasut ilaannasa suna tamaat nammassagaat. Tamanna politikerinngilarput. Kisianni nalornissutigineqassanngilaq, avantangiisinut akitsuutit tunngaviusumik iluarigatsigit, IA-p aningaasaqarneq pillugu oqaaseqartartua Naaja Nathanielsen oqarpoq. Aperarput, siunnersuut taamaatsillugu akuerissaneraat:

- Ataatsimiititaliami suliassanngortissavarput, Naaja Nathanielsen akivoq, neriorsuutigalugulu, siunnersuut taama isikkoqartillugu pingajussaaneernerani taasissutigineqarnavianngitsoq.

Inatsisissaq pingajussaaneerlugu suliarineqartinnagu allanngortinneqarnissaannik IA-miit taama oqalunneq illua tungiliuttuniit nuannaarutigineqarpoq.

- Qujanassusia inuit Ataqatigiit silattuallassimasut, uunga apeqqummut, Siumup politikikkut oqaaseqartartua, Karl Lyberth, oqarpoq.

Atassummi gruppip siulittaasua, Siverth K. Heilmann, aamma nuannaaqaaq:

- Torrak isuma. Isumaqarpunga, taanna paaseqatigiiffiusariaqartoq, atuisunut imaanngitsorujussusussaammat.

Siunnersuummulli taama akerliutigineq aningaasaqarnermut naalakkersuisup, Palle Christiansenip, tupaallaatigivallaanngilaa:

- Ilimagikannereerpara. Siunnersuummi avatangiisinik pitsanngorsaaniarnermik siunertarisarput amerlanerit paasilluarsinaavaat. Aamma Nunatta Karsia immerneqartariaqartoq, Inatsisartuni amerlanerpaat paasilluarsinnaavaat.

Taavali suliffeqarfinnik akitsuutinit akiliisussaanngitsunik siunnersuummi ilaqarnera naleqquttuunersoq nalilersoqquneqarpoq. Taamammat naalakkersuisoqarfiga piumaffigereerpara, sooq taamannak inerniliisariaqarsimanersugut, oqarpoq. nangillunilu:

- Una siunnersuut 2011-mi atugarissaarnissap aningaasalersorneqarnissaani

ilaagaluarpoq. Arlaat oqaruni, aningaasat uannga pissarsiarineqassanngitsut, taava allaniit isertitassanik tikkuussisariaqarput. Uangali isumaqarpunga, una siunnersut saqqummiussinnaasatsinnit pitsaanngitsunit ajunnginnerusoq, Palle Christiansen oqarpoq.