Naalakkersuisut annikitsumik aatsitassarsiorneq ineriartortinnerorusukkaat
Aatsitassanut naalakkersuisoq, Muté Bourup Egede, aatsitassarsiornermi killiffik suliniutillu pillugit tusagassiortunik marlunngormat ullaakkut katersortitsivoq.
Aatsitassarsiornermut inatsit nutaaq annikitsumik aatsitassarsiornerup ineriartornissaanut qanoq periarfissiinersoq naalakkersuisup oqaluuserineruai.
AAMMA ATUARUK Annikitsunik aatsitassarsiornissaq soqutigineqaleraluttuinnartoq
Annikitsumik aatsitassarsiornissamut akuersissutit inatsisip januaarimi atuutilinnginneranili amerleriarujussuarsimapput.
Akuersissutimmi 2010-mi arfinilioriarlutik siorna 49-nngorsimapput. Múte Bourup Egedellu KNR-imut oqaatigaa, ukioq manna qinnuteqaateqartorpassuaqareersoq.
Naalakkersuisullu ineriartortitsiinnarusupput, annikitsumillu aatsitassarsiortitsinerorusullutik paasissutissanik aviisimut Sermitsiamut tallimanngornermi saqqummertussamut ilanngussissapput.
Sunngiffimmi katersuisartunut malittarisassat qasukkaamineqartut
Annikitsumik aatsitassarsiornermut akuersissuteqartut kommunimi ataatsimi katersuinissaminnut piiaanissaminnullu pisinnaatitaaffeqalersinnaapput. Aamma sumiiffimmi 1x1 kilometerimik annertussusilimmi kisermaassisussaatitaalluni misissuisinnaatitaaffeqassapput, piiaasinnaatitaaffeqassallutillu.
Annikitsumik aatsitassarsiornissamut akuersissut takornariartitsinermi aamma atorneqarsinnaassaaq, tassalu akuersissuteqartut takornarianik angalaartitsilluni ujaqqanik pinnersaasianik katersuititsisinnaapput.
AAMMA ATUARUK Takornarniat kuultisiortinneqarsinnaannissaannut periarfissiisoq
Suliniuterpassuit suli mikigamik nunatta aningaasaqarneranut suli sunniuteqarpallaanngitsut, Múte Bourup Egedep oqaatigaa.
Akuersissutilli amerliartortillugit siunissaq ungasinnerusoq eqqarsaatigalugu suliffeqartitsinissaat, taamaalillutillu nunatta karsianut isertitaqaataalluarsinnaanissaat, Naalakkersuisut neriuutigaat.
Sunngiffimmilu katersisartunut nunaqavissunut malittarisassat qasukkaamineqartut, Múte Bourup Egedep erseqqissaatigaa. Sumiiffimmi pisinnaatitaassummik pigisaqartoq akuersisimappat, sunngiffimmi katersisartut nunaqavissut ujaqqanik pinnersaasiassanik ujaqqanillu erlinnartunik 100.000 koruunit tungaannut nalilinnik katersisinnaassapput.
