Naalakkersuisut annertuupilussuarmik amigartooruteqarnissaq pilersaarutigaat
”Oqimaaqatigiissitsinissarli” Naalakkersuisut siunnerfiginerarpaat.
Kisitsisit inaarutaasussat qanoq isikkoqarnissaat qaammatini tullerni naalakkersuinikkut oqallisigineqangaatsiartussanngorput.
Aningaasanulli inatsisissatut siunnersuut - naak annertuumik amigartooruteqarfiusussaagaluarluni - allaffissornermut aningaasanik ikinnerusunik atuiffiussaaq, peqqinnissaqarfik aningaasanik amerlanerusunik tunineqassaaq atuarfinnullu ilinniartitaanermullu aningaasaliissutit allannguuteqarpiassanngillat, naak Naalakkersuisut tamatumunnga tunngatillugu angusaqarusussuseqarluaraluartut.
Aningaasaqarniarniarneq isumalluarnartoqarpallaanngilaq
Vittus Qujaukitsup tusagassiortunik katersortitsinermi ilaatigut oqaatigaa, nunatta aningaaqarniarnikkut inissisimanera nalinginnaasumik ilungersunartuusoq. Akileraarutinit akitsuutinillu iluanaarutit ikinnerulersimapput.
Naalakkersuisup aamma erseqqissaatigaa, nunatta imartaani avaleraasartuunik qanoq aalisartoqartigisinnaanersoq suli nalorninartupilussuusoq.
Qujaukitsoq isumaqarpoq iluarsartuusseqqittoqartariaqassasoq aammalu soraarnerussutisiaqalernissamut akiliutaasartut aammalu aningaasaatinit iluanaarutit allatut akileraarusersorneqartariaqartut eqqaallugu.
- Inuiaqatigiinni iluarsartuusseqqittoqarnissaa pisariaqarluinnalersimavoq namminersorlunilu inuussutissarsiornerup iluani siuarsaasoqarnissaa pisariaqarluni, Vittus Qujaukitsoq oqarpoq.
Sanaartornerit ataqqinaataasussat inissaqartinniarunarlugit inissianik sanaartorneq annikillineqassaaq. Nuummili ilinniartut ineqarfissaannik 70-inik sanaartortoqarnissaa pilersaarutigineqarpoq. Kiisalu aamma Qaqortumi suluusalinnut mittarfiliornissamut 371 millionit koruuninik immikkoortitsisoqassaaq.
