Naalakkersuisut angerlaannalerput
Royal Greenlandip Tysklandimi Polenimilu suliffeqarfiutaannik naalakkersuisuni ilaasortat takusaanissaat qangali pilersaarusiorneqarsimasoq naalakkersuisunit unitsiineqartussatut aalajangiiffigineqarpoq.
Qasigiannguani Ilulissanilu suliffissuit matuneqarallarnissaat pillugu Royal Greenlandip piginnittuni, Namminersornerullutik Oqartussat, ilisimatissimanngimmagit, naalakkersuisuni siulittaasoq Hans Enoksen kamappoq.
Naalakkersuisuni ilaasortat sisamat pisortatik ilagalugit Royal Greenlandip Tysklandimi suliffissuaataanik Polenimilu suliffissuarmik pisiassatut takorluukkamik alakkaanissaq ajunngitsumik pilersaarusiarineqarpoq.
Royal Greenlandip piginnittuni siunissami suliffissuup alliartortinnissaanik pilersaarusioqatiginiarlugit eqqarsaatersuutigaa.
Politikerit Royal Greenlandimilu sulisut ullumikkut aallartussaagaluarput. Suliffissuarnilli matusigallaarnissaq akornutaaleriarsaarpoq.
Tassanngaannaq naalakkersuisut siulittaasuat Hans Enoksen Europami angalanissamut peqataarusukkunnaarpoq. Royal Greenland ippassaq ilisimatinneqarpoq, Hans Enoksen, Finn Karlsen aamma Josef Motzfeldt sisamanngornermi Tysklandimut angalaqataanatik tallimanngornermi nunatsinnukartussanngorsimasut, Qasigiannguani Ilulissanilu aalisartunik oqaloqatiginnissartik pissutigalugu.
Hans Enoksen radioaviisimut nassuiaavoq Namminersornerullutik Oqartussat pigisaani sulisut piginnitsiminik ilisimatitsisimannginnerat aalajangernermut tunngaviusoq.
- Royal Greenlandip piginnitsini matusinissani pillugu ilisimatittariaqaraluarpai. Sooq Danmarkimiilluta suliffissuit marluk qaammatini pingasuni matuneqarnissaat tusassavarput, Hans Enoksen Illu Atlantikumi namminersornerullutik oqartussat ukiortaarsiortitsineranni qaaqqusisuusoq taama oqarpoq.
Naalakkersuisut Royal Greenlandillu aqutsisui imminnut oqaloqatigiippiarsinnaanngitsut paasinarpoq.
Radioaviisip paasisai naapertorlugit Royal Greenlandimiit inuussutissarsiornermut pisortaqarfimmut matusigallarnissat pillugit allattoqarsimavoq. Piffissaagallartilluguli inuit nassiussiffigineqartut allakkanik tigusaqarsimanngillat.
Aalisartoq marlunngormat unnukkut imminut sianerluni oqaluttuarmat Hans Enoksenip aatsaat paasisimavaa suliffissuit matussasut.
Naalakkersuisut siulittaasuata nunatsinnukarnissamik aalajangernera Royal Greenlandip siulersuisuini siulittaasumit Paaviaaraq Heilmannimit ugguarineqarpoq.
Attaveqarnerluttarsimasinnarluta Naalakkersuisuni siulittaasorlu kiisalu KNAPK-mi siulittaasorlu ullumikkut oqaloqatigiinnerput aaqqissimavoq.
- Tamatta iluaqutigisinnaasatsinnik aaqqiissaagut, Paviâraq Heilmann oqarpoq.
Takornariarluni angalatitsineq sapaatiuppat naariarpat nunatsinnullu utersimaleriaruni Hans Enoksen piginnittut suliffissuarmilu ulluinnarni aqutsisut malittarisassiuunniarlugit ataatsimeeqatigissavaa.
Piginnittut, siulersuisut ulluinnarnilu aqutsisut tatigeqatigiillutik suleqatigiissinnaalernersut maanna apequtaalerpoq. Royal Greenlandip ukiuni tulliuttuni nunarsuarmi unammilleqatigiinnermi peqataajartulernermini tatigeqatigiinnissaq pisariaqartilluinnassavaa.
