Naalakkersuisut aluminiumik aatsitsivimmik pigineqataarusunngillat

Alcoa Maniitsup eqqaani aluminiumik aatsitsiviliorniarnermini Namminersorlutik Oqartussat affaanik piginneqatigiumavaa. Kisianni Naalakkersuisut tamatumunnga isumaqataanngillat. - Aamma piginneqatigiiffissuarmit Amerikameersunit tuavisaarneqarusunngillat, Nalakkersuisut siulittaasuat, Kuupik Kleist ullumi oqarput.

- Inatsisartuni siorna ukiakkut oqallinnermi amerlanerussuteqartut oqarpoq, piginneqataanissaq pilerinanngitsoq. Erngup nukinganik atuisinnaatitaanermut inatsisiliortoqaqqaartariaqartoq, taannalu naammassereerpat piginneqataanermut allatulluunniit aaqqissuussinermut tungassuteqartut nunatsinniit inarutaasumik isummerfigisinnaalissavarput, Kuupik Kleist oqarpoq.

Kalaallit Nunaanni Sulisitsisut Peqatigiiffiata pisortaata, Henrik Lethip, Sermitsiami Naalakkersuisut isornartorsiorpai, piginneqataanissamut apeqqummut isummerniarnerat kingaannerarlugu.

- Paasisinnaanngilarput, sooq piginnittuunissaq aallajangiiffigineqarsinnaangitsoq. Takussutissaqanngilaq, uppernarsaatissaqaranilumi, suliniutit sukkulluunnit Kalaallit Nunaannut iluaqutissaqarnersut. Taamaattumik assigiinnarpaa, Alcoamut ersarissumik nalunaaruteqarnissaq, Henrik Leth oqarpoq.

- Inuit Ataqatigiit isumaat ersarissoq allangunngilaq, tassalu pigineqataassanngitsugut. Illuanilli pissusissamisoorluinnassaaq, piumasaqaatit qanoq ittuusinnaaneri naammaseqqaarlugit, aatsaat inaarutaasumik aalajangernissaq, Kuupik Kleist oqrpoq.

Taassuma eqqaaasitsissutigaa, Nunatsinnimi inatsiseqanngimmat, assersuutigalugu erngup nukingata atorneqarsinnaaneranut piumasaqaatinik aalajangersaaffiusumik.

- Uangalu isumaqarpunga, tunngavissarititaasut illuatungeriit tamarmik ilisimaleqqaarlugit inaarutaasumik aalangertoqartariaqartoq, Naalakkersuisut siulittasuat oqarpoq.

Naalakkersuisooqataasut, Demokraatit, apeqqummi matumani isumartik aalajangiusimagaat, Kuupik Kleistip naatsorsuutigaa. Tassalu Naalakkersuisut tuavisaarneqarusunngillat, taaava suliniut iluatsinniarli imaluunniit naamik.

- Kisianni soorunami taamaassanngitsoq neriuutigaara, Kuupik Kleist oqarpoq.

Aluminiuliorfissaq 24 milliarder koruuninik naleqassangatinneqarpoq, Nunarpullu affaanik piginneqataassaguni, 12 milliarder koruuninik inik aningaasaliisariaqalersinnaavoq. Taamaalippallut Namminersorlutik Oqartussat aningaasarpassuarnik atorniartariaqalersinnaapput.

Greenland Development, Alcoa pillugu pisortanut siunnersuisuusoq, Radioaviisimut ipassaq oqarpoq, Nunarput piginneqataassanngippat, piginneqatasussanik allanit maanna ujarlertoqartoq.

Pisortaq, Flemming Drechsel, ilanngullugu oqarpoq, piginnittuunissamut tunngasumik arlaannilluunniit Naalakkersuisunut maannamut inassuteqaratik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat