Naalakkersuisut: Allatigut oqilisisaasoqarsinnaavoq

Ilaqutariit amerlasuunik meerartallit amerliartornerat aallaavigalugu ilanngaatit alliartortinneqartarnissaannut siunnersuut Inatsisartuni ullumi siullermeerneqarmat Naalakkersuisunit akuersaarnartinneqanngilaq.

Siunnersuut Inuit Ataqatigiit sinnerlugit Inatsisartuni ilaasortamit Agathe Fontainimit saqqummiunneqarpoq. Ilaqutariit amerlasuunik meerartallit aningaasaqarniarnikkut oqilisaassiffiginiarneqarnissaat siunertaralugu Inuit Ataqatigiit taama siunnersuuteqarput.

Akileraartarnermut inatsimmi paragraf 26 tunuliaqutaralugu Inuit Ataqatigiit siunnersuutertik tunngavilersorpaat.

Ilaqutariit meerartallit aningaasatigut oqilisaassiffiginiaraanni paragraf 26 aqqutigalugu ilanngaatit alliartortinneqarsinnaasut Agathe Fontainip oqaatigaa.

Naalakkersuisulli allatut isumaqarput.

- Ilaqutariit amerlasuunik meerartallit atugarisaasa ullumikkornit pitsaanerulersinneqarnissaat kissaatigineqarpat Naalakkersuisut isumaqarput tamanna toqqaannartumik aaqqiivigineqartariaqartoq akileraartarnermut inatsit aqqutigalugu toqqaannanngitsumik pinani, Naalakkersuisut Agathe Fontainimut akissuteqaateqarnerminni allapput, nangippullu:

- Tamanna pisinnaavoq ullumikkut meeqqanut tapiutaasartut pitsaanerulernerisigut, meeqqanut checkip atuutilerneratigut assigisaatigulluunniit, Naalakkersuisut allapput.

Siunnersuummi ilaqutariinnut meerartalinnut ilanngaatiginiakkap annertussusia aningaasartalerneqanngilaq, Naalakkersuisulli naatsorsuisitsisimanerisa takutippaat meeqqamut ataatsimut ilanngaat 20.000 koruuniussappat Nunatta karsianut kommuninullu 155 millioni koruuninik isertitakinnerunermik kinguneqassasoq.

Tamanna pissutigalugu siunnnersuut akuersaarnartinngikkitsik Naalakkersuisut oqaatigaat.